Ko pili o fanau mai ne Elisapeta tena pepe. Kae ne ‵nofo fakatasi lāua mo tena kāiga ko Malia i masina e tolu. Nei la, ko ‵tau o fakatofa atu a Malia kae toe faimalaga ‵mao atu ki tena fale i Nasaleta i te feitu ki matū. Kāti e toe ono masina kae ka fanau mai foki ne ia tena tamaliki tagata.

Ne fatoā ‵seke a Malia o fano, kae fanau a Elisapeta. Ko tafaga la te lasi o te fiafia i te taimi ne iku manuia ei te fanauga a Elisapeta kae e ma‵losi ‵lei eiloa tou fafine mo tena pepe! I te taimi ne fakaasi atu ei ne Elisapeta tena pepe ki ana tuakoi mo ana kāiga, ne fia‵fia fakatasi latou katoa.

Ne fai mai te tulafono a te Atua ki te kau Isalaelu me e ‵tau o pilitome se tamaliki tagata i te valu o aso mai tua ifo o tena fanaumaiga, kae e ‵tau foki o fakaigoa i te aso tenā. (Levitiko 12:2, 3) Ne mafau‵fau a nisi tino me e ‵tau o fakaigoa te tama tagata a Sakalia ki a ia. Kae ne faipati atu a Elisapeta, ana muna: “Ikai! ka fakaigoa a ia ki a Ioane.” (Luka 1:60) Masaua me ne fai atu a te agelu ko Kapilielu me e ‵tau o fakaigoa a te pepe tenei ki a Ioane.

Kae ne ita a tuakoi mo kāiga, olotou muna: “E seai se tino i ou kāiga e fakaigoa ki te igoa tenā.” (Luka 1:61) Mai te fakaaogaga o tāga, ne fesili atu latou ki a Sakalia me ko oi te igoa e manako a ia ke fakaigoa ki ei tena tamaliki tagata. Ne fai atu a Sakalia ke aumai se ma, kae ne tusi mai ne ia tena tali: “A tena igoa ko Ioane.”—Luka 1:63.

I konā loa, ne toe mafai ei o faipati a Sakalia i se auala fakavavega. Kāti e masaua ne koe me ne seki mafai o faipati tou tagata i te taimi ne seki talitonu ei a ia ki pati ne fai atu ne te agelu—me i a Elisapeta ka fanau mai ne ia se tamaliki tagata. Tela la, i te taimi ne faipati atu ei a Sakalia, ne ōfo masei ana tuakoi kae ne fesili ifo ki a latou eiloa penei: “Se a te tulaga ka oko ki ei te tamaliki tenei?” (Luka 1:66) Ne lavea atu eiloa ne latou te fesoasoani o te Atua i te auala ne fakaigoa ei a Ioane.

I konā, ne ‵fonu ei a Sakalia i te agaga tapu, kae ne folafola atu: “Ke vikia a Ieova, te Atua o Isalaelu, me ko oti ne saga atu a ia ki ana tino o faka‵sao latou. Kae ko  oti ne fakatu aka ne ia se sau o te fakaolataga mō tatou mai i te kāiga o Tavita tena tavini.” (Luka 1:68, 69) E auala i te “sau o te fakaolataga” telā e fakasino atu ki te Aliki ko Iesu, telā ka fanau mai fakamuli. E auala i te Tino tenā, ne fai mai a Sakalia me ka talia ne te Atua “ke tuku mai ki a tatou te tauliaga ke avatu ne tatou te taviniga tapu ki a ia e aunoa mo te ma‵taku, māfai ko oti ne faka‵sao tatou mai lima o ‵tou fili, fakatasi mo te alofa fakamaoni mo te amiotonu i ana mua i ‵tou aso katoa.”—Luka 1:74, 75.

Ne ‵valo mai a Sakalia e uiga ki tena tama: “Kae e pelā mo koe, e te tamaliki foliki, a koe ka fakaigoa ki te pelofeta a te Atua Tafasili i te Maluga, me ka mua atu koe i a Ieova o fakatoka tena auala, ke fakailoa atu ki ana tino te fekau o te fakaolataga e auala i te fakamagaloga o olotou agasala, ona ko te alofa atafai o te ‵tou Atua. Kae mai te alofa atafai tenei ka lavea ei ne tatou se mainaga mai te lagi e pelā mo te ata o te vaveao, e maina atu ki a latou kolā e ‵nofo i te pouliga mo te ata o te mate kae ke takitaki ei ‵tou vae mo te manuia i te auala o te filemu.” (Luka 1:76-79) Ko oko eiloa i te fakamalosi loto o te valoaga tenā!

I te taimi tenā ko ‵tau o oko atu a Malia ki Nasaleta, kae e seki avaga a ia. Ne a mea ka ‵tupu ki a ia māfai ko iloa ne tino i a ia ko faitama?