Elizabeti aahanle oyara. Saahivira myeeri miraru Maria ori ene ni Elizabeti. Vano waahiphiya okathi wira Maria otthikele owannyawe oNazarethi. Nto, saahala myeeri mithanu ni mmosa wira Maria oyare.

Nuumala Maria orowa, Elizabeti aahiyara. Tthiri vaari voohakalaliha woona wira Elizabeti ni mwanawe yaari akumi! Vaavo Elizabeti aawooniherya awe mwanawe amusi ni ale aattamanne awe, awo yaanihakalala.

Nlamulo Muluku aavanha awe aIsarayeli, naahimya wira nuumala oyariwa mwaana mwaamulopwana, aahaana wunnuwihiwa ni ovahiwa nsina nihiku na neethanu neeraru. (Onamukuttho 12:2, 3) Atthu akina yoona wira mwaana ole aahaana wiihaniwa Zakariya, nsina na tiithi awe. Masi, Elizabeti aahilavula oriki: “Nnari! Ihaniweke Yohani”. (Luka 1:60) Muupuweleke wira, nlaikha Gabriyeli naahimmye wira mwaana owo, aahaana ovahiwa nsina na Yohani.

Amusi ni ale aattamanne awe yaaninvaanyiha ariki: “Momusini mwanyu khavo onìhaneliwa nsina nlo!” (Luka 1:61) Alavulaka ni matata, yaahimukoha Zakariya nsina aaphavela awe onvaha mwanawe. Wira owaakhule, Zakariya aahiihaniha nipawe, khulepa wira: “Nsina nawe ti Yohani”.​—Luka 1:63.

Nuumala-vo, mwa mwiiriirya Zakariya aahitthikela olavula. Muupuweleke wira, owo aahihiya olavula mwaha woohikupali ele nlaikha naahimmye aya, eyo piiyo, wira Elizabeti ammuyara mwaana. Nto, vaavo Zakariya aalavula awe, ale aattamanne awe yaahitikinihiwa aniikoha so: “Khino mwan’ole onrowa okhala pani?” (Luka 1:66) Enamuna Yohani aavahiwa awe nsina, yahaakhaliherya atthu ale woona owerya wa Muluku.

 Muhoolo mwaya, Zakariya osaren’ye ene munepa wootteela aahimmye so: “Ottottopeliwa t’Apwiya, Muluku a Isarayeli, mana àxekurya nloko naya ni ahòpola. Awo àniruhela Mopoli òwerya, okhumme nloko na Davidi, murumeyi aya”. (Luka 1:68, 69) “Mopoli òwerya” ti Pwiya Yesu, yoowo aarowa oyariwa. Nave, Zakariya aahimmye wira, Muluku aarowa “omurumela yowo . . . [wira] nikhalé atthu òrera murima ni òloka vamaithoni vawe mahiku othene”.​—Luka 1:74, 75.

Olavulaka sa mwanawe, Zakariya aahihimya vahinatthi wira: “Vano weyo, mwan’aka, onimwihaniwa profeta a Muluku mulupalexa, mana onorowa oholo w’Apwiya, wira walokiherye iphiro sinrowaya ovira, olalèryaka nloko naya ehapari yo wopoliwa n’uleveleliwa itampi saya. Tthiri, Muluku ahu t’òsareya othunku: tivó ònixekurya arwaka wirimu, ntoko nsuwa na vosisu, wira àmwalele ale ankhala mwepiphini ni moripelani m’okhwa, ni wira anettiheke ephiro ya murettele”. (Luka 1:76-79) Tthiri ela eprofesia yoolipiha!

Okathi ole, Maria yoowo ahaatheliwe, aahiphiya owannyawe oNazarethi. Exeeni yaarowa okhumelela nuumala atthu osuwela wira oorupala?