Hirani na manganak hi Elizabeth. Ha sulod hin tulo ka bulan, kaupod niya an iya paryente nga hi Maria. Yana, kinahanglan na bumaya ni Maria ngan magbiyahe hin hirayo tipauli ha Nazaret. Mga unom ka bulan na la, manganganak liwat hiya hin bata nga lalaki.

Waray pag-iha katapos bumaya hi Maria, nanganak hi Elizabeth. Makalilipay gud nga naglampos an iya panganak ngan mahimsog hiya pati an bata! Han iginpakita ni Elizabeth an iya anak ha iya mga amyaw ngan paryente, nalipay liwat hira.

Sumala ha Balaud han Dios ha Israel, ha ikawalo ka adlaw katapos matawo an usa nga bata nga lalaki, sadang hiya turion ngan katapos ngangaranan. (Lebitiko 12:2, 3) Para ha iba, Sakarias liwat an sadang igngaran ha bata. Pero nagsiring hi Elizabeth: “Diri puydi! Juan an igngangaran ha iya.” (Lucas 1:60) Hinumdumi nga hi anghel Gabriel nagsiring nga Juan an igngangaran ha bata.

Diniri an mga amyaw ngan paryente, ngan nagsiring hira: “Waray bisan usa ha imo mga paryente nga sugad hito an ngaran.” (Lucas 1:61) Pinaagi ha pagsinyas, ginpakianhan nira hi Sakarias kon ano an karuyag niya igngaran ha iya anak. Nangaro hi Sakarias hin gutiay nga tabla ngan nagsurat: “Juan an iya ngaran.”—Lucas 1:63.

Tungod hito, milagroso nga nakayakan utro hi Sakarias. Mahinunumdoman mo nga waray na hiya makayakan han waray hiya tumoo ha ginsiring han anghel nga magkakaanak hi Elizabeth. Salit han nakayakan na hi Sakarias, nahipausa an iya mga amyaw ngan nagpakiana: “Magigin ano gud ba ini nga bata?” (Lucas 1:66) Nakita nira nga ginpaluyohan han Dios an paghatag hin ngaran kan Juan.

Katapos, hi Sakarias nga napuno han baraan nga espiritu, nagsiring: “Darayawon hi Jehova, an Dios han Israel, kay iya ginkaloy-an an iya katawohan ngan gintagan hira hin katalwasan. Ngan naghatag hiya hin sungay han katalwasan para ha aton ha panimalay ni David nga iya surugoon.” (Lucas 1:68, 69) Ha pag-unabi hin “sungay han katalwasan,” iya gintutudlok an Ginoo nga hi Jesus nga ig-aanak pa la. Hi Sakarias nagsiring nga pinaagi hito nga Usa, “katapos talwason kita [han Dios] tikang ha mga kaaway, ihahatag [Niya] ha aton an pribilehiyo han sagrado nga pag-alagad ha iya nga waray kahadlok, nga may pagkamaunungon ngan pagkamatadong ha iya atubangan ha ngatanan naton nga adlaw.”—Lucas 1:74, 75.

Hi Sakarias nagtagna may kalabotan ha iya anak: “Ikaw, anak ko, tatawagon ka nga propeta han Gihitaasi, kay mag-uuna ka kan Jehova basi iandam an iya mga dalan, basi isumat ha iya katawohan an mensahe han katalwasan pinaagi han pagpasaylo han ira mga sala tungod han mahigugmaon nga kalooy han aton Dios. Pinaagi hini nga kalooy, makikita naton an kalamrag tikang ha langit sugad han pagsirang han adlaw basi lamragan an nangangalingkod ha kasisidman ngan an nalalandongan han kamatayon, ngan basi malampuson nga giyahan an aton mga tiil ha dalan han kamurayawan.” (Lucas 1:76-79) Makapadasig gud ito nga tagna!

Hini nga takna, hi Maria nga waray pa asawa, nakauli na ha Nazaret. Ano an mahitatabo ha iya kon maklaro na nga burod hiya?