Mayaca gapa Elisabet baʼduʼ. Biaanané María laabe chonna beeu. Peru yanna maʼ bedandá ora guni viajar zitu para guibiguetaʼ xquidxi, Nazaret, ni riaana ladu guiá de Judea. Xhoopaʼ beeu si cayaadxaʼ para gapa María xiiñiʼ.

Qué nindaa de zeʼ María, beeda gapa Elisabet baʼduʼ, ne nazaaca gule baʼduhuiiniʼ que ne laaca nazaaca nuu Elisabet. Guizáʼ nayecheʼ nuu Elisabet ne Zacarías. Ne ora biluíʼ Elisabet baʼduhuiiniʼ que ca xpecinu ne ca pariente stiʼ, guizáʼ biéchecaʼ.

Biʼniʼ mandar Ley stiʼ Dios gaca circuncidar ca hombrehuiiniʼ lu xhono gubidxa de gule ne dxi ca riguixhecabe tu guiree lá (Levítico 12:2, 3). Caadxi binni nuu guiree lá baʼduhuiiniʼ que Zacarías, casi bixhoze, peru Elisabet bicabi: «Juan nga chiguiree labe» (Lucas 1:60). Cadi guiaandaʼ laanu ángel Gabriel guníʼ Juan guiree lá baʼduhuiiniʼ riʼ.

Ca xpecínube ne ca pariente stibe cadi nuucaʼ de acuerdu, ngue runi nacaʼ: «Guirutiʼ láʼ Juan ndaaniʼ familia stiluʼ» (Lucas 1:61). De raqué bíʼnicabe seña lu Zacarías tu racalaʼdxiʼ guiree lá xiiñiʼ. Para gunabaʼ Zacarías ti tablahuiiniʼ ne bicaa: «Juan nga labe» (Lucas 1:63).

Oraqueca guca ti milagru, biguetaʼ guníʼ Zacarías. Casi maʼ bizíʼdinu, qué ñanda niniʼbe purtiʼ qué ñuni crebe zapa Elisabet ti xiiñiʼ casi gudxi ángel que laabe. Nabé bidxagayaa ca vecinu stícabe ora bíʼyacaʼ maʼ caniʼbe ne nacaʼ: «¿Tu ndaʼ gueeda gaca hombrehuiiniʼ riʼ yaʼ?» (Lucas 1:66). Oraqueruʼ bidii ca binni que cuenta Dios nga guníʼ guiree lá baʼduhuiiniʼ que Juan.

Óraque bidxá Zacarías de espíritu santu ne ná: «Guisaca Jehová, Dios stiʼ Israel, purtiʼ maʼ biabe xquídxibe ne maʼ bilabe laa. Ne maʼ gundísabe tobi ni gulá laanu ne ni napa stale poder  de lade familia stiʼ David, xpínnibe» (Lucas 1:68, 69). Ni chigulá ne ni napa stale poder ni bizeeteʼ Zacarías nga, Señor Jesús ni caʼruʼ gale. Óraque guníʼ Zacarías zulá Dios xquidxi de lu náʼ ca enemigu stiʼ, ne pur Jesús zacaacaʼ privilegiu de gúnicaʼ ni nabe sin guidxíbicaʼ, sin gusaanacaʼ laabe ne gúnicaʼ ni jneza nezalube biaʼ dxi guibánicaʼ (Lucas 1:74, 75).

De raqué guníʼ Zacarías ti profecía ni caníʼ de xiiñiʼ: «Yanna lii, hombrehuiiniʼ, zábicabe lii profeta stiʼ Dios ni nuu guibáʼ, purtiʼ zazaníruluʼ nezalú Jehová para guni prepararluʼ ca neza stiʼ, para gudiiluʼ xquídxibe ti mensaje ni rulá ra gaca perdonar ca pecadu stiʼ, purtiʼ nabé riá Dios stinu laanu. Cumu riabe laanu la? zadúʼyanu ti biaaniʼ guibáʼ ni ruzaaniʼ casi ora zedará gueelaʼ, para guzaaniʼ ca ni zuba lu guelacahui ne lu bandáʼ stiʼ guendaguti, ne para chiné laanu lu neza stiʼ paz» (Lucas 1:76-79). Zándaca guizáʼ nayecheʼ biʼniʼ sentir ca binni que ora binadiágacaʼ ni guníʼ Zacarías.

Laga cayaca ndiʼ, yendá María ra lidxi, Nazaret. Cumu caʼruʼ guichaganabe la? ¿Xi ndaʼ guiníʼ binni ora ganna nacaxiiñibe yaʼ?