Мәрјәм дөрд ајдыр һамиләдир. Билдијимиз кими, о, һамиләлијинин илк ајларыны ҹәнубда, Јәһудијјәнин дағлыг әразисиндә јашајан Илсәбанын јанында кечириб. Инди исә Насирә шәһәринә, евинә гајыдыб. Доғма шәһәриндә тезликлә һамы онун һамилә олдуғуну биләҹәк. О, јаман чәтин вәзијјәтдәдир!

Үстәлик, Мәрјәмин Јусиф адлы бир дүлҝәрлә нишанлы олмасы онун вәзијјәтини лап гәлизләшдирир. О, јахшы билир ки, Аллаһын Исраилә вердији гануна әсасән, нишанлы гыз башга киши илә јахынлыг едәрсә, дашгалаг едилиб өлдүрүлмәлидир (Ганунун тәкрары 22:23, 24). Дүздүр, Мәрјәм әхлагсызлыг етмәјиб, амма буна бахмајараг, о, һамилә олдуғуну Јусифә неҹә изаһ едәҹәјинә вә нәләр баш верәҹәјинә ҝөрә нараһатдыр.

Јусиф Мәрјәми үч ајдыр ҝөрмәдији үчүн ону һәсрәтлә ҝөзләјир. Онлар ҝөрүшәндә Мәрјәм нә баш вердијини она данышыр. О, Аллаһын мүгәддәс руһундан һамилә галдығыны изаһ етмәјә чалышыр. Лакин сизин дә баша дүшдүјүнүз кими, буна инанмаг вә оланлары анлајышла гаршыламаг Јусиф үчүн һеч дә асан дејил.

Јусиф билир ки, Мәрјәм јахшы вә исмәтли гыздыр. О, бу гызы үрәкдән севир. Анҹаг Мәрјәмин бүтүн изаһатына бахмајараг, Јусифә јенә дә елә ҝәлир ки, нишанлысы јалныз башга кишидән һамилә гала биләр. Бунунла белә, Јусиф Мәрјәмин дашланыб өлдүрүлмәсини, јахуд ел ичиндә рүсвај олмасыны истәмир. Буна ҝөрә дә ону хәлвәти бошамаг истәјир. О вахтлар нишанлы олмаг евлилијә бәрабәр иди вә нишаны гајтармаг үчүн бошанмаг лазым ҝәлирди.

Јусиф бүтүн бунлары фикирләшә-фикирләшә јухуја ҝедир. Јухуда Јеһованын мәләји она ҝөрүнүб  дејир: «Арвадын Мәрјәми евинә ҝәтирмәјә горхма, чүнки о, бәтниндәки ушаға мүгәддәс руһ васитәсилә һамилә галыб. Мәрјәм бир оғул доғаҹаг, ушағын адыны Иса гојарсан, чүнки о, халгыны ҝүнаһлардан хилас едәҹәк» (Мәтта 1:20, 21).

Тәсәввүр едирсиниз, Јусиф јухудан ојананда Аллаһа нә гәдәр шүкр едир?! О, јубанмадан мәләјин дедији едир вә Мәрјәми өз евинә ҝәтирир. Ачыг-ашкар атылан бу аддым рәсми никаһын гурулдуғуну билдирир. Беләҹә, Јусифлә Мәрјәмин әр-арвад олдуғу һамыја мәлум олур. Амма Мәрјәм Исаја һамилә олдуғу мүддәтдә Јусиф онунла јахынлыг етмир.

Артыг Мәрјәмин доғуш вахты јетишир, лакин онлар јашадыглары Насирә шәһәриндән узаг сәфәрә чыхмаға һазырлашырлар. Мәрјәм белә һалда ола-ола, ҝөрәсән, онлар һара ҝедирләр?