Ra, diingot hamu dope tingki baru mardenggan pamatang si Maria, laho do ibana tu jabu ni tondongna si Elisabet na tading di Judea, inganan na mardolok-dolok di sabola selatan. Saonari, nunga mulak be si Maria tu Nasaret jala nunga opat bulan ibana mardenggan pamatang. Satongkin nai, botoon ni godang halak ma naung mardenggan pamatang ibana. Tontu marsak do si Maria alani i!

Asing ni i, nunga martunangan ibana dohot si Josep tukang hau na di huta i. Diboto si Maria do, molo adong borua na martunangan hape mangulahon seks dohot baoa na asing, mangihuthon Patik ni Debata tu halak Israel, ingkon didangguri do ibana dohot batu sahat tu na mate. (5 Musa 22:23, 24) Tutu, ndang na mangalangkup si Maria. Alai marsak do ibana paboahon tu si Josep naung mardenggan pamatang ibana. Jala sai dipingkiri ibana do ra aha ma na masa dungkon i.

Nunga tolu bulan si Maria ndang pajumpang dohot si Josep, tontu masihol do si Josep tu ibana. Tingki pajumpang nasida, ra marsitutu do si Maria patorangkon tu si Josep naung mardenggan pamatang ibana marhite tondi parbadia. Alai boi do dapot rohanta, maol do ra si Josep mangantusi jala porsea tu na masa i.

Holong do roha ni si Josep tu si Maria. Jala diboto ibana do halak na burju si Maria. Nang pe songon i, didok roha ni si Josep ndang boi si Maria mardenggan pamatang molo ndang alani baoa na asing. Alai ndang olo si Josep dangguran ni halak si Maria sahat tu na mate. Alani i, marsangkap ma ibana manirangkon si Maria, di na so pamotoan ni halak.  Ai di tingki i, molo nunga martunangan sasahalak dos do i songon naung marhasohotan, jala ingkon bahenon ni nasida do surat sirang tanda naung marsirang nasida.

Tingki dipingkiri si Josep taringot tusi, tarpodom ma ibana. Ro ma suru-suruan tu nipina, ninna ma, “Unang ma mabiar ho mangalap si Maria gabe dongan saripem, ai marhite tondi parbadia do ibana gabe-gabean. Tubuhononna ma anak, jala bahen ma goarna Jesus, ala paluaonna do bangsona sian dosa ni nasida.”​—Mateus 1:20, 21.

Dung dungo si Josep, las ma rohana ai nunga diboto ibana na sasintongna. Pintor diulahon ibana do na nidok ni suru-suruan i jala diboan ma si Maria tu jabuna. Di tingki i molo sahalak borua diboan tu jabu, dos ma i songon pesta parbogason na paboahon tu angka halak naung marhasohotan nasida. Alai ndang mangulahon seks si Josep dohot si Maria sahat tu na tubu Jesus.

Piga-piga bulan dungkon i, ingkon borhat ma si Josep dohot si Maria sian Nasaret, hape naeng partus nama si Maria. Naeng tudia do nasida?