Abume Marie é nga ke ngon ényin. Bia beta simesane na, a nga lôte bengone b’ôsu ya abume dé be Élisabeth, évuvumane jé, e minkôle ya Judée mfa’a ya sud. Ve éyoñe ji, Marie a bulaneya ja dé, e Nazareth. Bôte be mbeme yemelane na, a ne abum. Tame simesan abim avé jam ete da tyele nye nleme yôp!

Jam da beta bo bo abé é ne na, Marie a bili atiñ aluk a kafinda éziñ ya vôm ate a ne jôé na Joseph. A yeme jam é ne kui nye a lat Atiñe Zambe a nga ve bone b’Israël na, nge minga a bili atiñ aluk a fam, éyoñ éte a vañe ke jô’ôbô a fame fe, ba yiane lume nye mekok a wôé nye. (Deutéronome 22:23, 24) Ajô te, to’o a nji bo mejian, Marie a sili émien aval avé a ye kate Joseph na a te nyoñ abum, a jé ja ye kui mvuse ya valé.

Marie a keya dulu den a ntoo ngon élal, nde bi ne jô na, Joseph a ne ôjeja’a ya yene nye. Éyoñe ba yenan, Marie a kate nye jam da kui nye, a yiane jeñ a ngul ése na a timine nye aval a nga nyoñ abum a zene ya mbamba nsisime Zambe. Bi ne simesane na, jam ete e nji bo tyi’ibi ya wôk nge kañese asu Joseph.

Joseph a yeme na, Marie a ne mbamba minga, a na, a bili mbamba ntaban. A nye’e fe nye angôndô ya abui. Ve akusa bo mam mese a jô nye, Joseph nye a yeme na, minga a vo’o be’e abum nge a nji jô’ôbô a fam. Joseph a nji yi na be lume nye mekok, a wôé nye, nge na, be samele nye e bôt été; nde a tyi’i nlem été na, ba nye ba zu tyam aluk asoé. Melu mete, e mise me bôt, bôte be mbe be bili atiñ aluk, be mbe  ve ane bôte be nto nlu’an; nde, é mbe é sili’i na be tyam aluk asu na be kandan.

Mvuse ya valé, éyoñe Joseph a ngenan a kele a bindi jam ete nlem été, nde a ke ôyo. Ange Yéhôva ve kui nye biyeyem a jô’ô na: “Te ve’ele ko woñe ya nyoñe Marie, e minga wôé. Amu na, e mon a ye bialé be nye a ne ésaé mfufube nsisim. Ajô te a ye biaé monafam, ô yôlé nye jôé na Yésus; amu a ye kôté ayoñe bôt éto minseme jap.”​—Matthieu 1:20, 21, Mfefé Nkôñelan.

Éyoñe Joseph a vee ôyo, a wô’ô angôndô ya mevak amu a nga wô’ô mam ne sañesañ! A nji jañele éyoñe ya bo aval ange a te jô nye. A nyoñe Marie nda jé. A ne jam da liti bôt été na, Marie ba Joseph be nto nlu’an. Ve jame da, Joseph a nji jô’ôbô a Marie nté ôse a ne abum.

Mvuse bone bengon, Joseph ba Marie ba yiane kômesan na ba ke dulu, ôyab a Nazareth, akusa bo na Marie a mbeme biaé. Nde, ba ke ñhe vé, é too ke na Marie a nga zu biaé?