I fer kat mwan depi ki Mari i ansent. Petet ou rapel ki ler Mari ti’n fek tonm ansent, i ti al vizit son fanmir Elizabet ki reste dan bann montanny Zide dan sid. Me la Mari in retourn kot li Nazaret. Byento tou dimoun dan sa lavil pou konnen ki i ansent. Zis mazinen ki kantite difisil sa sityasyon i ete pour Mari!

Sa ki fer keksoz pli pir ankor, se ki Mari in fiyanse avek Zozef, en sarpantye ki reste dan menm landrwa avek li. Mari i osi konnen ki dapre Lalwa ki Bondye ti donn nasyon Izrael, en madanm ki’n fiyanse avek en msye ki volonterman dormi avek en lot zonm i devret ganny saboule avek ros. (Deterononm 22:23, 24) Alor, menm si Mari pa’n fer nanryen mal, i tre probab ki i pe mazinen ki mannyer i pou eksplik Zozef ki i ansent e ki pou arive apre sa.

Mari pa ti la pour trwa mwan, alor Zozef i vreman kontan pour vwar li. I tre probab ki ler zot zwenn, Mari i dir li ki i ansent e i esey son mye pour eksplike ki se gras a lespri sen Bondye ki sa in arive. Me parey ou kapab mazinen, i difisil pour Zozef konpran e krwar sa.

Zozef i konnen ki Mari i en bon fiy e ki i annan en bon repitasyon. I kontan Mari en kantite. Me malgre sa ki Mari i dir li, pour Zozef i paret ki Mari i bezwen ansent pour en lot dimoun. Zozef pa oule ki i ganny saboule avek ros oubyen fer li onte devan tou dimoun, alor i deside pour divors li an sekre. Sa letan, de dimoun ki ti’n fiyanse ti konmsi zot ti’n fini  marye, alor pour kas en fiyansay zot ti bezwen divorse.

Zozef i ankor pe reflesir lo tou sa bann zafer. I al dormi e en lanz Zeova i aparet avek li dan en rev. I dir li: “Pa bezwen per pour anmenn ou madanm Mari kot ou, akoz sa ki’n arive avek li i gras a lespri sen. I pou ganny en garson e ou pou apel li Zezi, akoz i pou sov son pep dan zot pese.”​—Matye 1:20, 21.

Ler Zozef i leve, i vreman kontan ki aprezan tou keksoz i pli kler. I pa tarde pour fer sa ki sa lanz in dir li. I anmenn Mari kot li. Anfet, sa i vin parey en seremoni maryaz ki montre tou dimoun ki aprezan Zozef ek Mari in marye. Me kantmenm sa, Zozef pa annan relasyon seksyel avek Mari tan ki i ankor ansent.

Detrwa mwan pli tar, Zozef ek son madanm Mari ki pros pour ganny pti baba, i bezwen met zot pare pour kit zot lakour Nazaret e fer en gran vwayaz. Kote zot bezwen ale, la ki Mari i ansent?