Foa hë lao treu ne upune Maria. Ngöne lo itre pane treu i angeic, qa i angeice hna pane tuë Elisabeth, trejin me angeic, ka mel ngöne la götrane kolojë ne la itre wetr e Iudra. Ngo enehila, Maria ha bëek a tro Nazareta. Nge, easenyi hë matre mama pi la upune i angeic. Matre, pane mekune jë la trenge xoue i angeic!

Ame la ejolen, ke ase hë othi Maria koi Iosefa, atre tratrau sinöe e Nazareta. Nge atre hi angeic la hna qaja hnene la wathebo i Akötresie koi angetre Isaraela, laka, ame la föe hna oth, nge ka ce meköl me ketre trahmany, tro ha tran ameci angeic hnei etë. (Deuteronomi 22:23, 24) Nge ngacama tha hane kö Maria ce meköl me ketre trahmany, ngo ma angeice jë a thel la aqane troa qejepengöne koi Iosefa la upune i angeic, nge ma angeice fe a mekune la thangan.

Köni treu ne pane patre hnei Maria, matre tha jole kö koi së troa mekune la trenge aja i Iosefa troa iöhnyi hmaca me angeic. Ngo ame la nyidroti a iöhnyi hmaca, hnei Maria hna tupathe troa qejepengöne hnyawa koi Iosefa. Hnei angeic hna isin troa qejepengöne laka, ua i Akötresie la qaane la upune i angeic. Ngo trotrohnine hi eö laka, jole pi hë koi Iosefa troa trotrohnin me mejiun.

Atre hi Iosefa laka, föe ka lolo nge ka hlemu loi Maria. Matre atraqatre la ihnimi Iosefa koi Maria. Ngacama Maria a isine troa qejepengöne hnyawa koi Iosefa, ngo ame koi angeic, tro hmekuje hi Maria a upune hnei trahmany. Ame pe, tha aja i Iosefa kö troa tran ameci  Maria, nge goi xele fe angeic troa ahmahmanyi Maria; matre angeic a nyiqaane thele jëne troa sei hna cile juetrë. Ame ngöne la ijine cili, hna xome ceitunëne la itre hna oth me itre ka faipoipo hë, matre nyipiewekë troa sei hna cil göi troa apëne la hna oth.

Thupene lai, ngacama Iosefa pala kö a hace hnine la ewekë ka traqa, ngo angeic a tro ju troa meköl. Ame hnei angeice hna puje la angela i Iehova, kola hape: “The xou kö troa xomi Maria kowe la hnalapa i eö, ke, ame la hnei angeic hna troa hnahon, tre, qaathene la uati hmitrötr. Tro angeic a hnahone la nekönatre trahmany, nge tro eö a ati ëjen, Iesu, ke, tro nyën a thapa la itre atr qa ngöne la ngazo.”—Mataio 1:20, 21.

Ame ju hi la Iosefa a hlë, drei jë kö la etrune la ole i angeic, ke lualai hnyawa ha koi angeic! Saqe hi angeic trongëne la hna amekötine hnene la angela. Matre, angeic a lö sai Maria jë kowe la hnalapa i angeic. Aqane anyipicine lai koi nöjei atr laka, ka faipoipo hë nyidro. Ketre, tha hane ju kö Maria me Iosefa ce meköl ngöne la ijine Maria a upune Iesu.

Itre treu thupen, hmekune la itre treu tixenuë i Maria, nyidroti a hnëkë jë troa fek qa Nazareta. Ngo nyidroti a kötr a tro ië, nge easenyi hë tro Maria a hnaho?