Maria le eƒe fufɔfɔ ƒe ɣleti enelia me. Àɖo ŋku edzi be eyi ɖasrã Elizabet kpɔ le eƒe fufɔfɔa ƒe gɔmedzeɣi le Yudea togbɛwo dzi le anyiehe gome. Gake fifia Maria trɔ gbɔ va wo de Nazaret. Eteƒe madidi o, amewo ava nya be efɔ fu. Bu ale si gbegbe wòanya ɖo xaxa mee ŋu kpɔ!

Nu si gagblẽ nyaa ɖe edzie nye be wodo Maria ɖeɖe ŋugbe na Yosef, si nye atikpala aɖe si le wo gbɔ. Eye enya be le Se si Mawu de na Israel-viwo nu la, ne wodo nyɔnu aɖe ŋugbe na ŋutsu aɖe gake nyɔnua lɔ̃ faa dɔ kple ŋutsu bubu la, woƒua kpee wòkuna. (5 Mose 22:23, 24) Eya ta togbɔ be Maria medɔ kple ŋutsu aɖeke kpɔ o hã la, anɔ eme be enɔ ale si wòle eƒe fufɔfɔa me ɖe ge na Yosef kple nu si ava dzɔ la ŋu bum.

Maria dzo ɣleti etɔ̃e nye ema, eya ta míate ŋu aka ɖe edzi be Yosef di vevie be yeakpɔe. Anɔ eme be esi wodo go la, Maria gblɔ eƒe fufɔfɔa ŋu nya nɛ, eye wòwɔ etɔ sinua heɖe eme nɛ be to Mawu ƒe gbɔgbɔ kɔkɔea ƒe ŋusẽ mee yefɔ fua le. Gake abe ale si nàkpɔe ene la, asesẽ na Yosef ŋutɔ be wòase nya sia gɔme ahaxɔ edzi ase.

Yosef nya be Maria nye nyɔnu nyui si ŋu ŋkɔ nyui le. Eye elɔ̃e vevie hã. Ke hã, nu ka kee wòanya gblɔ o, ewɔ na Yosef be ŋutsu aɖe kokokoe anya do fui. Yosef medi be woaƒu kpee wòaku alo woado ŋukpee le dutoƒo o; eya ta eɖoe be yeagbee le adzame. Le ŋkeke mawo me la, wobua ame siwo do ɖeɖeŋugbe na wo nɔewo la abe srɔ̃tɔwo ene, eye wobiaa srɔ̃gbegbe  tso ŋugbedolawo si be woatsɔ atso ŋugbedodoa me.

Emegbe esi Yosef ganɔ nya siawo ŋu bum la, eyi ɖamlɔ anyi. Yehowa ƒe dɔla ɖe eɖokui fiae le drɔ̃e me hegblɔ nɛ be: “Mègavɔ̃ srɔ̃wò Maria kpɔkplɔ va aƒewò me o, elabena fu si wòfɔ la, gbɔgbɔ kɔkɔe mee wòtso. Adzi ŋutsuvi, eye nàna ŋkɔe be Yesu, elabena eyae aɖe eƒe dukɔ tso eƒe nu vɔ̃wo me.”—Mateo 1:20, 21.

Esi Yosef nyɔ la, aleke gbegbe wòada akpee nye esi be nyaa me va kɔ azɔ! Ewɔ ɖe mawudɔlaa ƒe mɔfiamea dzi enumake. Ekplɔ Maria yi eƒe me. Le nyateƒe me la, gaglãgbenuwɔna sia nye srɔ̃ɖekɔnu si ɖee fia be fifia Yosef kple Maria woɖe wo nɔewo. Gake Yosef medɔ Maria gbɔ esime Yesu ƒe fu nɔ eƒo o.

Le ɣleti aɖewo megbe la, eva hiã be Yosef kple Maria, si ƒo fu tsi ɖo la nazɔ mɔ tso wo de Nazaret. Afi kae wòhiã be woayi le ɣeyiɣi sia si me Maria ƒe vidziɣi ɖo?