María hyeguasúma de cuatro mése. Oiméne ñanemanduʼa haʼe hyeguasu riremínte oho hague Elisabet rógape, oĩva Judéape sur gotyo. Péro koʼág̃a oĩ jeýma hógape Nazarétpe. Koʼẽrõite ojekuaátama hese hyeguasuha, ha upéva oipyʼapy hína chupe.

Hiʼarive María oĩ komprometída omenda hag̃ua peteĩ karpintérore hérava José. ¿Mbaʼéichapa oexplikáta Josépe hyeguasuha espíritu sánto rupive? ¿Oroviátapa chupe? María oikuaa porã Ñandejára Léi heʼiha peteĩ kuñataĩ vírhen oĩva komprometída, orekóramo rrelasión sexuál ótro kuimbaʼéndi, ojejapi vaʼerãha itápe omano meve (Deuteronomio 22:23, 24). ¡Ajépa ijetuʼuete María situasión!

Ojapóma tres mése María oviaha hague, ha katuete ningo José ohechasetereíma chupe. Ojotopávo hikuái, oime vaʼerã María oñehaʼãmbaite oexplika chupe hyeguasuha espíritu sánto rupive. Ñapensamíntena mbaʼeichaitépa oiméne ijetuʼu raʼe Josépe ontende ha orovia hag̃ua upe oikóva.

José oikuaa María siémpre hekoporã hague, ha ohayhueterei chupe. Péro ijetuʼu chupe orovia hag̃ua la heʼíva. María omombeʼu porãramo jepe la oikóva, oime vaʼerã José opensa hyeguasuha ótro kuimbaʼégui. Péro haʼe ndoipotái oñemotĩ ni ojejuka Maríape, upévare ojedivorsiase chugui ñemiháme. Upe tiémpope, umi oĩva komprometído omenda hag̃ua, oñekonsideráma omendávaicha, ha ikatu hag̃uáicha opa pe kompromíso, tekotevẽmante ojejapo peteĩ divórsio.

Upe rire José ojepyʼamongeta koʼã mbaʼére, ha opyta oke. Péro Jehová ánhel ojeaparese  iképe ha heʼi chupe: “Ani rekyhyje regueraha hag̃ua ne rembireko María nde rógape, haʼe ningo hyeguasu espíritu sánto rupive. Haʼe imembýta peteĩ mitãʼi ha rembohéra vaʼerã Jesús, haʼe oipeʼáta rupi umi héntepe ipekadokuéra poguýgui” (Mateo 1:20, 21).

Opáy rire, José oñetrankilisaite, pórke ontendéma la oikóva. Upémarõ pyaʼe porã ojapo pe ánhel heʼíva chupe, ha ogueraha Maríape hógape. Upe tiémpope, peteĩ kuimbaʼe oguerahávo hógape inóviape, ohechauka enterovépe omendaha hína hese. Péro María hyeguasu aja, José ndorekói rrelasión sexuál hendive.

Unos kuánto mése rire, José ha María ojapo vaʼerã peteĩ viáhe puku, hiʼarive María hyeguasuetéma. ¿Moõpa oho vaʼerã hikuái?