Maria udah ngandung empat bulan. Sebedau nya, iya nemuai ngagai Elisabet ke diau ba endur ti bebukit di Judea, ba begian selatan Nasaret. Tang diatu, Maria udah pulai ngagai Nasaret. Enda lama da agi, orang deka nemu Maria udah ngandung. Iya tentu berasai amat irau!

Maya nya, Maria udah betunang enggau siku tukang kayu ke benama Josep. Maria nemu nitihka Adat Petara, enti siku indu ke udah betunang ngereja pengawa seks enggau lelaki bukai, indu nya enda tau enda dituku ngena batu nyentukka iya mati. (Ulang Adat 22:23, 24) Taja pan Maria nadai ngereja utai ti salah, tang iya engka irau pasal chara iya deka madahka utai nya ngagai Josep. Maria mega irau pasal utai ke deka nyadi pengudah Josep nemu iya ngandung.

Josep amat lelengauka Maria laban seduai iya udah tiga bulan enda betemu. Lebuh seduai iya betemu, Maria madah ngagai Josep pasal iya ke ngandung ketegal kuasa kudus Petara. Taja pia, Josep tentu tusah deka mereti sereta pechayaka utai nya.

Josep amat sayauka Maria. Lalu iya nemu, Maria siku indu ti amat manah. Taja pia, Josep tusah deka nerima utai ke dipadah Maria. Tu ketegal, siku indu semina ulih ngandung enti iya ngereja pengawa seks enggau lelaki. Tang iya enggai Maria dituku ngena batu tauka dikemaluka ba mua orang mayuh. Nya alai, iya deka nyarakka Maria enggau chara ti belalai. Maya nya, orang ke udah betunang dikumbai udah kawin. Nya alai, enti sesiku orang deka putus tunang, iya patut ngulihka surat sarak.

 Lebuh Josep berundingka utai nya, iya tetinduk. Udah nya, siku melikat datai dalam mimpi iya lalu madahka: “Anang takut ngambi Maria nyadika bini, laban Maria ngandung ketegal kuasa kudus. Maria deka ngadaka siku anak lelaki, lalu nuan patut ngangauka anak nya Jesus, laban iya deka nyelamatka orang ari dosa.”—Matthew 1:20, 21.

Josep amat gaga ati laban iya bulih saut ti terang! Pengudah iya dani, iya terus nitihka utai ti diasuh melikat nya. Iya mai Maria pulai ke rumah iya. Enggau chara tu, iya nunjuk ngagai semua orang, iya udah jadi enggau Maria. Taja pia, Josep enda beleman enggau Maria nyentuk ngagai Jesus ada.

Beberapa bulan udah nya, Josep enggau Maria patut pansut ari Nasaret lalu bejalai ngagai endur ti jauh. Kini penunga sida taja pan maya nya Maria nyauka beranak?