Maliya wajinga na jiimi ja bañondo bana. Vulukai’mba bañondo batanshi panyuma ya kwimita, Maliya waikele ne Elisabeta mu mpunzha ya mitumba ya mu Yudea ku kabeta ka ku bulenge. Bino pa kino kimye Maliya wabwelele ku muzhi wa Nazala. Kwashajiletu pacheche kuba’mba bantu bayuke’mba waimita. Onkao mambo, waakaminwe bingi.

Kyakijishepo kutama ke kya kuba’mba Maliya bamwipangwizhe kwi kalipentala wa jizhina ja Yosefwa. Kabiji wayukile’mba kwesakana na Mizhilo Lesa yo apele bena Isalela, mwanamukazhi ye baipanguzha inge walaala na mwanamulume ungi bamwasanga mabwe ne kufwa wafwa. (Mpitulukilo ya mu Mizhilo 22:23, 24) Onkao mambo, nangwa kya kuba Maliya kechi walaajilepo na mwanamulume ne, kyamweka walangulukilenga bya kulumbulwila Yosefwa byo aikele na jiimi ne bikamumwekela.

Byo kiji kuba’mba Maliya wafuminepo bañondo basatu, kyamweka Yosefwa wakebeshe bingi kumumona. Byo bamonañene, kyamweka Maliya wabuujile Yosefwa amba wajinga na jiimi, ne kumulumbulwila’mba mupashi wazhila wa Lesa ye walengela’mba emite. Bino byonka byo mwayuka, kechi kyamupelejile Yosefwa kuswa ne.

Yosefwa wayukile’mba Maliya wajinga mwanamukazhi wawama kabiji uji na byubilo byawama. Kabiji wamutemenwe bingi. Nangwa kya kuba Maliya wamulumbulwijile byo kyajinga, kwi Yosefwa kyamwekeletu nobe bamwimishe ku mwanamulume ungi. Pano bino, Yosefwa kechi wakebele’mba Maliya bamwase mabwe afwe nangwa kumulengesha bumvu ku bantu ne. Onkao mambo, wafuukwilepo kumukana mu bufyamfya. Mu oa moba,  banabakazhi bo baipanguzha bebamonangatu nobe basongolwa kala, kabiji inge bakeba kwibakana, bebakanangatu nobe bantu baji mu masongola.

Yosefwa byo akilangulukilenga pa bino bintu, waponejile mu tulo. Malaika wa Yehoba wamwekele kwi aye mu kiloto ne kumwambila’mba: “Kange uchine kutwala Maliya mukazhobe ku nzubo ne, mambo awa ye aimita wamwimita na mupashi wazhila. Ukasema mwana wa mulume kabiji ukamutumbe’mba Yesu, mambo aye ukapulusha bantu ku bundengamambo bwabo.”—Mateo 1:20, 21.

Yosefwa byo abukile watemenwe bingi, mambo pano wayukile kwafumine jiimi ja kwa Maliya. Ponkapotu waubijile monka mwamubujile malaika. Wasendele Maliya ku nzubo. Kino kyo aubile kyamwesheshe patoka’mba Yosefwa wasongola Maliya. Pano bino, Yosefwa kechi walaajilepo na Maliya byo akijinga na jivumo ja kwa Yesu ne.

Pa kupitapo bañondo, Yosefwa ne Maliya saka aji na jiimi, bafwainwe kuya ku mpunzha ikwabo kufuma mu muzhi wabo wa Nazala. Kwepi ko bafwainwe kuya Maliya saka ajitu pepi kupaapa?