E vumu kia Maria kilungisi ngonde yá. Sungamena dio vo vava kabaka lukau, wayenda kingula yitu kiandi Elisabete kuna sude ya miongo mia Yuda. Kansi owau, Maria ovutukidi kuna vata diandi, Nazarete. E vumu kiandi se kimoneka kwa wantu awonso. Kieleka, Maria otokanene kikilu.

Nga ozeye diambu dinkutokanesanga? Maria nzitikila kena yandi, Yosefe wa mvadi-anti. Maria ozeye wo vo Nsiku a Nzambi kwa Isaele uvovanga vo, avo ndumba wazitikilwa olele ye toko diankaka, kafwete tubwa matadi yavana kefwa. (Nsiku 22:23, 24) Kana una vo katele zumba ko, Maria kazeye ko una kesasila diambu diadi kwa Yosefe, ngatu zaya dina divangama.

Maria ngonde tatu kaviokese kuna mbanza yankaka. Muna kuma kiaki, Yosefe ozolele monana yandi. Wau bamonanene, Maria umvovese vo vumu kena kiau, ovangidi mawonso muna kunsasila vo mu mwand’avelela Nzambi kayimitini. Kieleka, avo uyisidi vana fulu kia Yosefe, omona vo diampasi mu bakula yo tambulwila e diambu diadi.

Yosefe ozeye wo vo Maria nkento ambote, otomene zayakana muna fu yandi yambote. Yosefe otoma kunzolanga. Kansi, mu kuma kia dina kavovele, Yosefe oyindwidi vo yakala diankaka unyimitisi. Yosefe kazolele ko vo Maria katubwa matadi ngatu fusulwa e nsoni vana meso ma ndonga. Muna kuma kiaki, obakidi nzengo za vonda longo kuna nsweki. Muna lumbu yayina, o nzitikila wabadikilwanga se nkento wasompwa, avo kinzitikila kifokokele, bavovanga vo longo lufwidi.

Ekolo Yosefe ketokananga mu kuma kia diambu diadi, owondokele kuna tulu. O mbasi a Yave monekene kwa yandi yo vova vo: “Kumoni wonga ko wabonga Maria wa nkaz’aku, kadi kina kena kiau muna mwand’avelela kayimitini kio. Mwan’a yakala kewuta, okumvana e nkumbu a Yesu, kadi yandi ovuluza nkangu andi muna masumu mau.”—Matai 1:20, 21.

Yosefe wau kasikamene, oyangalele kikilu kadi obakwidi vo e vumu ke kia yakala diankaka ko. Kazingidi ko mu vanga dina mbasi kamvovese. Obongele Maria yo kunata kuna nzo andi. Wau kavangidi wo vana meso ma ndonga, i sinsu kia lukazalu lwau. Owau dizayakene vo Maria nkaz’a Yosefe. Kansi, Yosefe kasidi leka Maria ko ekolo kena ye vumu kia Yesu.

Vioka ngonde zayingi, Yosefe yo Maria bakubamene mu vanga nkangalu wandá, muna sisa vata diau Nazarete. Kansi, e vumu kia Maria kikolele. Akweyi bekwenda wau vo e ntangwa kewuta ifinamene?