SHAPITA 4
Mary—Madia Waimita Aye Kasongelwe
-
YOSEFA WAYUKA’MBA MADIA UDI NA DĪMI
-
YOSEFA WASONGE MADIA
Madia kadi na dīmi dya myeji 4. Vuluka’mba aye pa kwimita, waendele kukapempula mubutule wandi Edisabeta udi mu ngulu ya Yudea idi dya kunshi. Ino pano Madia i mujokele kwandi ku Nazala. Panopano ponka bonso basa kumona dīmi dyandi. Uno mwanda ye uno umukambakanya ku mutyima!
Kadi kibi mpata na uno mwanda, Madia i mukwatyilwe na Yosefa, nsendwe wa mbao enka wa mu kibundi’mwa. Kadi Madia uyukile amba mungya Bijila bya Leza ku bene Isalela, mwana-mukaji mukwatyilwe na mwana-mulume ino wakalāla na mukwabo ufwaninwe kwaswa mabwe. (Kupituluka 22:23, 24) Nansha Madia byakalongelepo busekese, ye uno wiipangula pa mwa kulombwela Yosefa ya dīmi ne pa mobisa kupityila.
Madia wadi mwende myeji isatu, nanshi Yosefa ye uno wabila bine kwimona nandi. Abo pa kwimona, Madia wamusapwila’mo ya dīmi amba i dya ku mushipiditu ujila wa Leza. Inoko monka mowebimwena, ke kipēlapo kudi Yosefa kwivwanija ne kwitabija uno mwanda.
Yosefa uyukile amba Madia i mwana-mukaji muyampe kadi wa ngikadilo miyampe. Kadi umusenswe bininge. Nansha byaamulombola nabya, Yosefa walanga’mba kudi mwana-mulume’tu umupēle dīmi. Yosefa kasakilepo bāse Madia mabwe nansha kumufwija bumvu pa bantu; o mwanda, walanga ya kwilubula nandi kufula. Mu mafuku’a, muntu mukwatyilwe wādi umonwa enka bwa musongwe, kadi pa kuleka’byo, byādi bilomba’nka kwikale kilongwa kya dilubu.
Yosefa pa kulanguka, bine wasangala mwanda waivwanija mobikadile! Ne kwija mpika, walonga monka mwamusoñenya mwikeulu. Waselela Madia kwandi. Kuno kumusela i kilongwa kya patōkelela, kinkumenkume kya butundaile, kilombola bantu bonso amba pano ba Yosefa ne Madia abesonge. Nansha nankyo, Yosefa kasambakenepo na Madia kufika ne byabutula Yesu.
Myeji pa kupita’po, dīmi papo ke mbutwila pi, ba Yosefa ne Madia abakute lwendo lwa kutamba kwabo ku Nazala. Ino Madia byalēmenenwe na dīmi, le kobasaka kadi kwenda i kwepi?