Maliya apwile nalijimo lyatukweji vawana. Namwanuka ngwenu omu emichile, ayile kuli kausoko kenyi Elizaveta uze atwaminenga kusulo, kungalila yajipili yaYuleya. Oloze halwola kanelu akindulukile kwimbo lyenyi kuNazaleta. Kalinwomu vatu vamungalila yenyi vejive ngwavo nemita. Achishinganyekenu ukalu apwilemo ou mwanapwevo.

Ukalu kana waunene mwomwo halwola kanelu Maliya vamuhuhwile kuli muka-kusonga maliva, Yosefwe. Kaha nawa ejivile ngwenyi kweseka naJishimbi jize Kalunga ahanyine vaIsalele, pwevo vahuhwa lyehi nge mwalisavala nalunga weka kaha vatela kumwasa malolwa afwenga. (Lushimbi lwamuchivali 22:23, 24) Ngocho, numba tuhu Maliya kalingile ujilako, oloze pamo apwile nakuhuhwasana omu nahase kulumbununa vyalijimo lyenyi kuli Yosefwe navyuma navisoloka.

Hakuwana nge Maliya ayile ungeji hatukweji vatatu, tunafwelela ngwetu Yosefwe afwilile kumumona chikupu. Omu valiwanyine, Maliya pamo amwambulwilile mujimbu wosena. Pamo esekele kumulumbunwina kanawa ngwenyi nemita lijimo nashipilitu yajila yaKalunga. Oloze nge omu munejiva, chapwile chachikalu kuli Yosefwe kufwelela mujimbu kana.

Yosefwe ejivile ngwenyi Maliya apwile pwevo wamwenemwene uze nawa apwile napuho yamwaza. Kaha nawa amuzangile nyi kuya muze. Oloze chamokomoko navyuma alumbunwine Maliya, chasoloka nge Yosefwe ashinganyekele ngwenyi vanamwimichisa kuli lunga weka. Chipwe ngocho, Yosefwe kasakile Maliya vamwase malolwa afwenga chipwe asauke kumeso avatuko. Ngocho ashinganyekele kumulukulula mukusweka.  Hamakumbi aze, vatu vaze valishikile kulimbata vavamwenenga nge valimbata lyehi, ngocho vatelelele kulilukulula numba valyeche.

Shimbu Yosefwe apwile nakushinganyeka hachihande kanechi, ayile mutulo. Jino kangelo kaYehova ejile nakumulotesa. Amulwezele ngwenyi: “Kanda nawivwa woma wakumbata pwevo lyove Maliyako, mwomwo eli lijimo nalimita nashipilitu yajila. Mwakasema mwana walunga, kaha ukamuluka lijina ngwove Yesu, mwomwo ikiye mwakalwila vatu jenyi kujishili javo.”—Mateu 1:20, 21.

Omu Yosefwe ahindukile kutulo, awahililile chikuma mwomwo echi chihande chamulumbunukilile jino. Chakuzeneka kulangisa, alingile muze amulwezele kangelo. Ambachile Maliya nakuya nenyi kuzuvo yenyi. Hakulinga ngocho asolwele hatoma kuvatu nge Yosefwe naMaliya vanalimbate jino. Chinafwane nge valingile chiwanyino chakulimbata. Oloze Yosefwe kalisavalile naMaliyako hamakumbi osena aze apwile nalijimo lyaYesu.

Omu mwahichile tukweji, Yosefwe naMaliya uze akulishile jino chikuma, vakashile ungeji vafume mwimbo lyavo muNazaleta. Uno vapwile nakuya kulihi okunyi Maliya ali hakamwihi nakusapuluka?