Mimba ya Maria yainga yaano mweji murongomuna. Ceujanyi kuti wakapeja mweji mutatu yo kutanga yo mimba yake naari ka Erizabheti ukama hwake, ku matundhu o Judheya, kakusi ko Jerusarema. Asi Maria wainga wahwirira kumuzi kwake, Nazareta. Apa wari, mimba yake yainga yoda kuvoneka ngo vese. Munokwanisa kuvona kuti mugariro uu waizomutambuja kudini here?

Cinoitisa kuti zvishate maningi ngo cokuti Maria no muvezi wo mundharaundhemo waidanijwa Josefa vainga vakaitirana cigondiso co kucadha vese. Zve Maria waiziva kuti Mutemo wakapuwa vaIziraeri ndi Mwari, unonanga kuti kudari mwanakaji wakagondesana no mwanarume, akaita bonde no mwanarume umweni ngo kuda kwake, anozofuhwa ngo mapuwe mbhera kufa. (Deuteronòmio 22:23, 24) Ngo kudaro, pikija Maria aazivi kuita bonde no ariwese, waizvibvunjisa kuti waizozvinangisa kudini kuna Josefa zve mbzinyi zvaizomuitikira.

Tino gwinyiso rokuti Josefa wainga no cidaka-daka co kuvona Maria ngokuti wainga acimo mundharaundhemo ko mweji mutatu. Povakawanana, kangaije Maria wakabvunja Josefa zvaanazvo, ecivangisira kumudurujira kuti mimba iyi ndaiwana ngo mujimu mucena wa Mwari. Asi inga zvomunorangarira, zvinonesa maningi kuti Josefa azvizwisise no kuzvitenda.

Josefa waizviziva kuti Maria i mwanakaji waushoni zve ano mufambiro wakanaka. Zve Josefa waimuda maningi. Asi pikija no zvainanga Maria, Josefa waindovona kuti wakawana mimba ngo kuvatana no mwanarume umweni. Josefa aacaida kuti Maria afuhwe ngo mapuwe kana kupserujwa pakazara vandhu. Ngokudaro, anotema civaringo co kumuramba ngo cifishe-fishe. Mu njiku  jondhojo, vandhu vakagondesana vaivoniwa inga vakatocadha zve paidiwa kurambana kuti cipere cigondiso.

Pa kufamba ko nguva, Josefa paaindorangarira shwiro iji, wakaenda koovata. Ngirozi ya Jehovha yakamugumira mu hope, yoti: “Ucathya kuaxira mukaji wako Maria; ngokuti bzakamitwa mu ndani make [‘zvakaitwa ngo mujimu mucena,’ Shanduro yeNyika Itsva]. Anozobara mwana worume, unozomudura zina rake kuti ndi Jesu, ngokuti anozoponesa vandhu vake mu bzixaixi bzavo.”—Mateu 1:20, 21.

Josefa paakamuka, wakadakara maningi ngokuti shwiro iyo yakazojekeswa ushoni. Iyena aazivi kunonoka kuita zvaakabvujwa ngo ngirozi. Wakatora Maria woenda nae kumuzi. Ciito ici co pambhene caishanda inga mutango-mutango jo mucadho zve cakajekesa kuti Josefa na Maria vacadha. Asi Josefa aazivi kuita bonde na Maria paainga no mimba ya Jesu.

Mumweji jakazotevera, Josefa na Maria vaidikana kunasirira kuti vaite hwendo, kubva pa muzi pavo kuenda Nazareta. Vaidikana kuenda kwapi pa mukuvo wokuti Maria wainga woda kubara?