Maria o kgweding ya gagwe ya bone a imile. Gopola gore nako ya gagwe ya mathomong a imile o e feditše a etetše motswalo wa gagwe e lego Elisabetha kua mebotong ya Judea ka borwa. Eupša bjale Maria o boetše gae Natsaretha. Kgauswinyane batho ba mo ba tla tseba ka go ima ga gagwe. Akanya kamoo boemo bjo e lego bjo bo gateletšago kudu go yena!

Seo se mpefatšago boemo le go feta ke gore Maria o beeleditšwe ke mmetli wa lefelong leo e lego Josefa gore a mo nyale. Le gona Maria o tseba gore go ya ka Molao wa Modimo wo a o neilego Baisiraele, mosadi yo a beeleditšwego ke monna yo mongwe eupša ka boomo a robala le monna yo mongwe, o swanetše go bolawa ka go kgatlwa ka maswika. (Doiteronomio 22:23, 24) Ke ka baka leo, gaešita le ge Maria a se a itshwara gampe, mohlomongwe a ipotšišago gore o tla hlalosetša Josefa bjang ka boimana bja gagwe le gore go tla direga eng.

Ka ge Maria a be a sepetše lebaka la dikgwedi tše tharo, gona re ka kgonthišega gore Josefa o be a hlologetše go mmona. Ge ba kopana, mohlomongwe Maria o mmotša ka boemo bja gagwe, a dira sohle seo a ka se kgonago go mo hlalosetša gore o imišitšwe ke moya o mokgethwa wa Modimo. Lega go le bjalo, ka ge o ka inaganela, go thata kudu gore Josefa a kwešiše taba ye le go e dumela.

Josefa o a tseba gore Maria ke mosadi wa go loka le gore o na le botumo bjo bobotse. E bile o mo rata kudu. Lega go le bjalo, go sa šetšwe seo a mmotšago sona, Josefa o bona feela a be a ka imišwa ke monna yo mongwe. Josefa ga a nyake gore a bolawe ka go kgatlwa ka maswika goba a gobošwe phatlalatša; ka baka leo, o dira phetho ya gore a mo hlale ka sephiring. Mehleng yeo, batho bao ba beeletšanego ba be ba tšewa ba nyalane, gomme peeletšo yeo e be e swanetše go fedišwa ka tlhalo.

Ka morago, ge Josefa a sa dutše a naganišiša ka ditaba tše, o ya go robala. Morongwa wa Jehofa o iponagatša go yena torong gomme a re: “O se tšhabe go iša Maria mosadi wa gago gae, gobane seo a se imilego ke ka moya o mokgethwa. Yena o tla belega morwa gomme leina la gagwe o mmitše Jesu, gobane o tla phološa batho ba gabo dibeng tša bona.”—Mateo 1:20, 21.

Ge Josefa a tsoga, o thabišitšwe kudu ke gore bjale kgang e rarolotšwe! Ga a dikadike go dira seo morongwa a mmoditšego gore a se dire. O ya le Maria gae. Ge e le gabotse, ye ke tiro ya phatlalatša yeo e lego tirelo ya monyanya wa lenyalo, yeo e tsebatšago gore Josefa le Maria bjale ba nyalane. Lega go le bjalo, Josefa ga a be le dikopano tša botona le botshadi le Maria a sa imile Jesu.

Ka morago ga dikgwedi, Josefa le Maria, yo a lego kgauswi le go belega, ba swanetše go itokišeletša leeto la go tloga ga gabo bona kua Natsaretha. Ba swanetše go ya kae mola Maria a le kgauswi le go belega?