Марийӕ ныр цыппӕрӕм мӕй уыд сывӕрджын. Хъуыды йӕ кӕндзынӕ, куы басывӕрджын, уӕд фыццаг цалдӕр мӕйы кӕй арвыста йӕ хӕстӕг Елизаветӕимӕ Иудейӕйы хӕхбӕсты, хуссарырдыгӕй. Фӕлӕ ныр фӕстӕмӕ сӕхимӕ Назаретмӕ ӕрыздӕхт. Ӕмӕ тагъд иууылдӕр базондзысты, сывӕрджын кӕй у, уый. Ахъуыды-ма кӕн, Марийӕ цы зын уавӕры уыд!

Йӕ бӕллӕх ма ноджыдӕр уый мидӕг уыд, ӕмӕ сӕхи горӕтӕй иу лӕппуимӕ, хъӕддӕсны Иосифимӕ, фидыд уыди. Марийӕ зыдта, фидыд чи уыд, ахӕм чызг ӕндӕр искӕимӕ барвӕндонӕй ӕмуат куы ’рцыдаид, уӕд ӕй, Хуыцау Израилы адӕмӕн цы Закъон радта, уымӕ гӕсгӕ, дуртӕй кӕй хъуамӕ амардтаиккой (Дыккаг закъон 22:23, 24). Уӕдӕ кӕд Марийӕйӕн йӕ зӕрдӕ йӕхиуыл ницӕмӕй худт, уӕддӕр куыннӕ мӕт кодтаид. Сывӕрджын кӕй у, уый цымӕ Иосифӕн куыд бамбарын кӕндзӕн ӕмӕ йӕ хабар дарддӕр куыд уыдзӕн?

Марийӕ ӕртӕ мӕйы сӕхимӕ нӕ уыд, ӕмӕ йӕм Иосифӕн, хӕрзаг, йӕ цӕстытӕ ныуурс сты. Куы фембӕлдысты, уӕд ын Марийӕ, ӕвӕццӕгӕн, загъта, йӕхи бар кӕй нӕу ӕмӕ, йӕ бон куыд уыди, афтӕ йын бамбарын кодта, Хуыцауы сыгъдӕг тыхӕй кӕй басывӕрджын. Фӕлӕ уӕддӕр уыцы хабар бамбарын ӕмӕ йыл баууӕндын Иосифӕн ӕнцон кӕм уыдаид.

Иосиф зыдта, Марийӕ хӕрзӕгъдау чызг кӕй у ӕмӕ йын адӕмы ’хсӕн хорз ном кӕй ис. Стӕй йӕ уарзгӕ дӕр тынг кодта. Фӕлӕ йӕм уӕддӕр афтӕ каст, ӕмӕ Марийӕ кӕмӕйдӕр басывӕрджын – уӕдӕ ӕндӕр уымӕн гӕнӕн куыд уыди?! Фӕлӕ цӕмӕй Марийӕйы дуртӕй ма фӕхостаиккой ӕмӕ ма фӕхудинаг уыдаид, уый тыххӕй Иосиф сфӕнд кодта, цӕмӕй йӕ сусӕгӕй ауагътаид, ома дзы ахицӕн уыдаид. Уӕды заманты-иу лӕппу ӕмӕ чызг куы бафидыдтой, уӕдӕй фӕстӕмӕ-иу лӕг ӕмӕ усыл нымад уыдысты. Ӕмӕ цӕмӕй уыцы фидыд  йӕ тыхы мауал уыдаид, уый тыххӕй-иу хъуамӕ ахицӕн уыдаиккой.

Ӕхсӕвы Иосиф уыцы уӕззау хъуыдытимӕ бафынӕй. Ӕмӕ йӕм фыны Йегъовӕйы зӕд фӕзынд ӕмӕ йын загъта: «Дӕ ус Марийӕйы дӕ хӕдзармӕ ӕрбакӕн, ма тӕрс, уымӕн ӕмӕ Хуыцауы сыгъдӕг тыхӕй басывӕрджын. Райгуырдзӕн ын лӕппу, ӕмӕ йӕ схондзынӕ Йесо, уымӕн ӕмӕ уый адӕмы сӕ тӕригъӕдтӕй фервӕзын кӕндзӕн» (Матфейы 1:20, 21).

Иосиф райсомӕй куы райхъал, уӕд куыннӕ сулӕфыдаид – хъуыддаг цӕй мидӕг уыд, уый бамбӕрста! Ӕмӕ йын зӕд куыддӕриддӕр загъта, афтӕ сарӕзта – Марийӕйы ӕнӕ уӕлдай ракӕ-бакӕйӕ йӕ хӕдзармӕ ӕрбакодта. Лӕппу-иу чызджы йӕ хӕдзармӕ куы ’рбакодта, уӕд-иу уый ууыл дзурӕг уыди, ӕмӕ сӕ цард баиу кодтой. Уӕдӕ Иосиф Марийӕйы йӕ хӕдзармӕ куы ’рбакодта, уӕд адӕм иууылдӕр базыдтой, лӕг ӕмӕ ус кӕй систы. Фӕлӕ цалынмӕ Йесо нӕ райгуырд, уӕдмӕ Иосиф Марийӕимӕ ӕмуат не ’рцыд.

Цалдӕр мӕйы фӕстӕ, Марийӕйы сывӕллон ныййарынмӕ бирӕ куы нал хъуыд, уӕд сӕ Иосифимӕ бахъуыди дард балцы ацӕуын. Фӕлӕ цымӕ ахӕм уынгӕджы рӕстӕг кӕдӕм цыдысты?