Maria ya tabatin kuater luna na estado. Kòrda ku el a pasa su promé tres lunanan serka su famia Elisabèt, kende tabata biba den zùit, den e serunan di Hudea. Awor ku Maria tabata na Názarèt bèk, hende por a kuminsá nota ku e ta na estado. Bo por imaginá bo e situashon difísil ku e tabata den?

I loke a hasi e situashon pió ta ku e tabata komprometí pa kasa ku un karpinté ku tabata yama Hose. Maria tabata sa ku, segun e Lei ku Dios a duna Israel, mester a piedra i mata un mucha muhé ku tabata komprometí pa kasa i ku boluntariamente a tene relashon seksual ku un otro hòmber. (Deuteronomio 22:23, 24) Pero Maria no a kometé inmoralidat. Podisé e tabata puntra su mes kon lo e por a splika Hose ku e ta na estado i kiko lo a pasa.

Hose tabatin tres luna sin mira Maria, pues lo e tabata ansioso pa mir’é. Ora nan a topa ku otro, probablemente Maria lo a purba di splik’é e situashon, esta, ku el a sali na estado pa medio di Dios su spiritu santu. Pero, manera bo por imaginá, esaki lo tabata algu difísil pa Hose komprondé i kere.

Hose tabata sa ku Maria tabata un bon mucha muhé i ku e tabatin un bon reputashon. E tabata stima Maria mashá. Tòg, p’e, e úniko manera ku Maria por tabata na estado ta si el a tene relashon ku otro hòmber. Pero e no tabata ke pa Maria ser brongosá públikamente òf pa  nan piedra Maria mata; p’esei, e kier a divorsiá di dje sekretamente. E tempu ei, parehanan komprometí pa kasa tabata ser konsiderá komo kasá. Pues, tabatin mester di un papel di divorsio pa nan por a kibra nan kompromiso.

Mas despues, pensando riba e asuntu, Hose a pega soño. I un angel di Yehova a aparesé na dje i a bis’é: “Hose, yu di David, no tene miedu di kasa ku Maria pa motibu ku el a sali na estado, pasobra esei a tuma lugá pa medio di spiritu santu. Lo e duna lus na un yu hòmber, i bo mester yam’é Hesus, pasobra lo e salba su pueblo di nan pikánan.”—Mateo 1:20, 21.

Ora Hose a lanta for di soño, e tabata kontentu ku e asuntu a bira mas kla p’e. Mesora el a hasi manera e angel a bis’é i a hiba Maria su kas. E tempu ei, esei tabata un manera públiko pa demostrá ku un pareha a kasa ofisialmente. Pero Hose no a tene relashon ku Maria promé ku Hesus a nase.

Algun luna despues, Hose i Maria, kende tabata serka di haña yu, a kuminsá prepará pa hasi un biahe largu. Dikon nan mester a bandoná Názarèt siendo ku un ora pa otro Maria por a duna lus?