Mariaqa wiksayakusqan punchawkunamantam Elisabetwan Judea law urqupi karqa. Chaymantam Nazaret llaqtapi wasinman kutikurqa. Ichaqa manchakuywanmi kachkarqa yaqa tawa killa wiksayuqña kasqanta runakuna rikurunanmanta.

Chaymantapas Mariaqa Joseywan casarakunanpaqmi rimapayasqaña karqa. Mariaqa yacharqataqmi pi warmipas manaraq casarakuchkaspan hukwan puñuruspanqa rumiwan wañuchisqa kananmanta, chayqa Diospa kamachikuyninmi karqa (Deuteronomio 22:23, 24). Mariaqa manam piwanpas puñurqachu, chaywanpas manchakuywanmi kachkarqa ima nispan Joseyman wiksayuqña rikurinanmanta.

Joseyqa Mariawanmi tupaykuytaña munarqa kimsa killaña mana rikunakusqankurayku. Chaymi Mariaqa Joseywan tupaykuspan suma-sumaqta willarqa Diospa atiyninwan wiksayakurusqanmanta. Joseymi ichaqa llumpayta iskayrayaspan hukmanyarurqa.

Mariata llumpayta kuyaspanpas hinaspa lliwpa riqsisqan allin warmi kasqanta yachaspanpas Joseyqa hinallam iskayrayarqa. Payqa sunqunpim nikurqa “hukwan puñuruspanmi wiksayakurun” nispa. Chayna kaptinpas manam munarqachu rumiwan chamqaparuptinku Maria wañuchisqa kanantaqa nitaq pinqayman churasqa kanantaqa. Chaymi mana pipa yachasqallanta divorciakuyta munarqa. Chay tiempopi runakunaqa casarasqata hinañam rimapayasqaña kaqkunatapas qawaqku. Chaymi rakinakunankupaqqa divorciakunanku karqa.

 Chayna hukmanyasqa kachkaspan Josey puñuruptinmi Diospa angelnin musquyninpi nirqa: “Ama manchakuychu warmiki Mariata wasikiman pusaytaqa, payqa wiksayakurun chuya espiritupa atiyninwanmi. Qari wawatam wachakunqa, hinaptinmi sutichanki Jesuswan, paymi runankunata salvanqa huchankumanta”, nispa (Mateo 1:20, 21).

Chaynapim Joseyqa puñusqanmanta rikcharirurqa, hinaptinmi sunqullanpas tiyaykurqa. Hinaspam angelpa kamachisqanman hina lliwpa rikusqanta Joseyqa Mariata wasinman pusakurqa. Chayta ruwasqanmi casarakusqankuta qawachirqa. Ichaqa Maria wachakunankamam Joseyqa paywan mana puñurqachu.

Chaymanta qipakunamanqa yachasqanku Nazaret llaqtamantam karuta illananku karqa. Mariaqa ñam unqukunanpaq hinaña kachkarqa. Hinaptinqa, ¿imanasqataq illananku karqa?