Mariya ali na pathupi pa miyezi minai. Kumbukani kuti miyezi yakutoma ya pathupi, iye akhali na wacibale wace Elizabheti ku cisa ca mapiri ca Yudeya. Mbwenye cincino Mariya abwerera kwawo ku Nazareti. Mwakukhonda dembuka, anthu azinji anadziwa kuti iye ali na pathupi. Pyenepi pikhandzudzumisa kakamwe.

Mariya akhadzudzumika kakamwe na pyenepi thangwi iye akhabanyirana na nyakupala matabwa unango anacemerwa Zuze. Iye akhadziwa kuti Mwambo udapereka Mulungu kwa Aizraeli, ukhalonga kuti nkazi wakuti ali cifupi na kumanga banja angapita m’mabonde na mamuna unango akhafunika kuponyerwa miyala mpaka kufa. (Deuteronomyo 22:23, 24) Maseze Mariya nee acita ulukwali, panango iye akhabvundzika kuti analonga tani kwa Zuze kuti iye ali na pathupi, pontho ninji pinafuna kudzancitikira.

Mariya akhala miyezi mitatu kunyumba kwa wacibale wace, na thangwi ineyi, Zuze akhadantsuwa, pontho akhafuna kakamwe kumuona. Pidagumanikana iwo, panango Mariya ampanga pyonsene pidancitikira, mbampanga kuti iye ali na pathupi kubulukira ku nzimu wakucena wa Mulungu. Mbwenye pyenepi pikhali pyakunentsa kakamwe toera Zuze apibvesese na kupikhulupira.

Zuze akhadziwa kuti Mariya ndi nkazi wakubalika, pontho wamakhaliro adidi, na thangwi ineyi, iye akhanfuna kakamwe. Ngakhale kuti Mariya akhadafokotoza mwadidi pidacitika, Zuze akhanyerezera kuti iye ali na pathupi kubulukira kwa mamuna unango. Nakuti Zuze nee akhafuna kuti Mariya aponyerwe miyala mpaka kufa, peno kupwazwa na anthu, iye anyerezera pyakumwalana naye mwacibisobiso. Mu ndzidzi unoyu, anthu akuti akhali cifupi toera kumanga banja akhaoniwa  ninga amanga banja, natenepa, toera amwalane akhafunika kutowezera pitsogolero pibodzi pyene pikhatawirisa anyakumanga banja kumwalana.

Mu ndzidzi ukhapitiriza Zuze kunyerezera pyenepi, aphatwa na citulo mbagona. Anju wa Yahova aonekera kwa iye mu ndoto mbampanga: ‘Leka kugopa kukwata nkazako Mariya mbuenda naye kunyumba thangwi pathupi pana iye paoneka na mphambvu za nzimu wakucena. Iye anadzabala mwana wamamuna, unthule Yezu thangwi iye anadzapulumusa mbumba m’madawo awo.’—Mateu 1:20, 21.

Pidalamuka Zuze, apereka takhuta kakamwe thangwi yakubvesesa mwadidi nkhani ineyi! Mwakukhonda dembuka Zuze acita pidapangwa iye na anju. Akwata Mariya mbaenda naye kunyumba kwace. Kucita kwace pyenepi kukhapangiza pakweca kuti iye na Mariya amanga banja. Ngakhale tenepo, Zuze nee apita m’mabonde na Mariya mu ndzidzi ukhali iye na pathupi pa Yezu.

Pakupita miyezi mingasi, Zuze na Mariya akhafunika kucita ulendo wakulapha kubuluka ku Nazareti. Kodi iwo akhafuna kuenda kupi mu ndzidzi unoyu wakuti Mariya akhali cifupi toera kukhala na mwana?