Fadeso, Marie ayeke na ngo ti nze osio. Tongana mo girisa ape, na ngoi so lo mû ngo pan, lo gue lo lango na ndo ti Élisabeth, so ayeke mbeni fami ti lo so ayeke lango na yâ ti ahoto ti Judée, na mbage ti sud ti Jérusalem. Me ti fadeso, Marie akiri na Nazareth awe, na ngo ti lo ni aga nduru ti sigi awe. Tara ti bâ kpale so lo yeke tingbi ande na ni!

Ye so asara si kpale ni akiri aga ngangu ayeke so lo na mbeni charpentier ti kodro ni, Joseph, amä tere ti sara mariage. Marie ahinga nga so ti gue oko na Ndia ti Moïse, tongana mbeni wali, so mbeni koli aye ti mû lo, ayeda na bê ti lo wani ti bungbi na mbeni koli nde, a lingbi a bo lo na tênë juska lo kui (Deutéronome 22:23, 24). Atâa so a yeke ye so lo sara la ape, peut-être Marie ayeke gi bê ti lo lani na tënë so lo yeke tene ande na Joseph ti fa tongana nyen la lo mû ngo ni so, nga lo yeke pensé na ye so ayeke passé ande na pekoni.

Joseph ayeke lani na kota nzara ti bâ Marie, ndali ti so a sara nze ota tongaso awe la lo na lo abâ tere ape. Na ngoi so ala wara tere, peut-être Marie asara na lo tënë ti ye so asi na lo, na lo yeke gi ti fa na lo so a yeke yingo vulu ti Nzapa la asara si lo mû ngo ni so. Peut-être tongana ti so mo kue mo pensé, a doit ti duti lani ngangu mingi na Joseph ti mä yâ ti tënë so nga ti yeda na ni.

Joseph ahinga so Marie ayeke mbeni nzoni wali, na so azo kue ahinga ni tongaso. Na ndo ni, lo ye Marie mingi. Me, atâa atënë kue so Marie atene na lo, peut-être Joseph apensé so a yeke mbeni koli la azia ngo ni so. Me na mbage, lo ye si a bo Marie na tênë ape wala a zia kamene na lê ti lo na devant ti azo kue ape. Ni la, lo leke ti divorcé na Marie na hondengo ni. Na ngoi ni kâ lani, tongana mbeni koli ague na peko ti mbeni wali, azo ayeke bâ ala tongana azo so asara mariage awe. Ni la tongana ala ye ti kangbi, a lingbi ala sara divorce.

Na pekoni, na ngoi so li ti lo angbâ na ndo ti atënë ni so, Joseph ague alango. Mbeni ange ti Jéhovah aga na lo na yâ ti bango li, na a tene na lo: “Mo sara mbeto pëpe ti mû Marie na da ti mo, teti ngo so lo më ayeke na lege ti yingo vulu. Lo yeke dü ande molenge ti koli. A lingbi mo zia iri ti lo Jésus, ndali ti so lo yeke sö ande azo ti lo na yâ ti asiokpari ti ala.”—Matthieu 1:20, 21.

Na ngoi so Joseph azingo na lango, tere ti lo anzere ndali ti so ye ni aga polele na yâ ti li ti lo awe. Droit lo mû Marie lo zia na da, tongana ti so ange ni afa na lo. Lani, sarango tongaso ayeke tongana mariage la, ndali ti so a yeke fa na lê ti azo kue so, Joseph na Marie ayeke fadeso koli na wali awe. Me, na ngoi so Marie ayeke lani na ngo ti Jésus juska lo dü na ni, lâ oko lo na Joseph abungbi koli na wali ape.

Anze kete na pekoni, Joseph nga na Marie, so ayeke fadeso na kota ngo, adoit ti leke tere ti ala ti sara mbeni voyage yongoro na da ti ala so ayeke na Nazareth. Me ala yeke gue na ndo wa tongaso, so a ngbâ nga na Marie ngoi mingi ape ti tene lo dü so?