Ua fā nei masina o le maʻitaga o Maria. Manatua foʻi, i uluaʻi masina o lona maʻitaga sa asiasi atu ai o ia i lona tauaiga o Elisapeta, i atumauga o Iutaia i le itu i saute. Ae o lea ua ia toe foʻi mai i lona aiga i Nasareta, lea o le a iloa ai e tagata le tulaga ua oo iā te ia. E mautinoa lava le matuā popole o Maria ona o lenei mea.

O le itu e sili ona faigatā ai, ona ua uma ona faamau Maria e avea ma avā a Iosefa le kamuta. E malamalama lelei Maria i le Tulafono a le Atua e faapea, pe afai e faamau se tamaʻitaʻi i se alii ae toe momoe ma se isi tamāloa, e tatau ona fetogi o ia i maa seʻia oti. (Teuteronome 22:23, 24) E ui lava la e leʻi momoe Maria ma se isi tamāloa, ae atonu o loo ia taumānatu po o le a faapefea ona faamatala iā Iosefa lona maʻitaga, ma po o le ā foʻi le mea o le a tupu.

E mautinoa lava le naunau o Iosefa e toe vaai atu iā Maria, auā ua tolu nei masina talu ona malaga ese o ia. Ua feiloaʻi nei i laʻua, ma ua taumafai Maria e faamatala atu o lona maʻitaga e mai i le agaga paia o le Atua. Peitaʻi, ua matuā faigatā lava iā Iosefa ona malamalama ma talitonu i lenei mea ua tupu.

E iloa e Iosefa o Maria o se tamaʻitaʻi e iai sona talaaga lelei, ma e matuā alofa faapelepele i ai. Peitaʻi, e ui i mea ua faamatala atu e Maria, ae e foliga mai iā Iosefa na tō Maria i se isi tamāloa. E lē manaʻo Iosefa e fetogi Maria i maa seʻia oti, pe faamāsiasi foʻi o ia i luma o tagata. O lea ua ia filifili ai e faateʻa iā te ia i se auala faalilolilo. I na aso, o tagata ua uma ona faamau sa vaai i ai ua uma ona faaipoipo, ma ina ia tatala le faamau sa manaʻomia ai se talagā faaipoipoga.

A o manatunatu Iosefa i nei mea, ua oo ina moe o ia. Ua faaali mai se agelu a Ieova iā te ia i se miti ma faapea atu: “Aua e te fefe e ave Maria lau avā i lou aiga, auā o lana tō e mai i le agaga paia. O le a fanau mai e ia se tama tama, e te faaigoa iā te ia o Iesu, auā o le a faaolaina e ia ona tagata mai i a latou agasala.”—Mataio 1:20, 21.

Ua ala Iosefa, ma ua fiafia ona o lea ua malamalama i le mea ua tupu. O lea, ua ia faia loa le mea na faatonu atu e le agelu. Ua ia ave Maria i lona aiga. O lenei gaoioiga i luma o le lautele, sa pei o se sauniga o le faaipoipoga, e faailoa atu ai o lea ua avea nei Iosefa ma Maria o se ulugalii faaipoipo. E leʻi faia e Iosefa ni feusuaʻiga ma Maria a o maʻitaga o ia iā Iesu.

Ua mavae atu ni nai masina, ma ua sauni Iosefa ma Maria e malaga ese mai i lo la aiga i Nasareta. O fea o le a la ō i ai, ae o lea ua toeitiiti lava oo i le taimi e fanau ai Maria?