Mariya wenga ndi nthumbu ya myezi yinayi. Kumbukani kuti wati waja ŵaka ndi nthumbu, wanguluta kwa mubali waki Elizabeti yo wajanga kumwera kwa mapiri nga ku Yudeya. Sonu, Mariya wanguwere kwawu ku Nazareti. Pa nyengu iyi, ŵanthu atingi aziŵengi kuti we ndi nthumbu. Ŵanaŵaniyani ŵaka mo iyu wangusuzgikiya maŵanaŵanu ndi nkhani yeniyi.

Mariya wasuzgikanga so ukongwa maŵanaŵanu chifukwa angupangana ndi Yosefi yo wenga kalipentala kuti atoranengi. Mariya waliziŵanga Dangu lo Chiuta wangupaska Ayisirayeli lakuti asani munthukazi wapangana kuti watoranengi ndi munthulumi ndipu wagonana ndi munthulumi munyaki, wakhumbikanga kubayika mwa kumuponya mya. (Marangu 22:23, 24) Chinanga kuti Mariya wangugonana ndi munthulumi weyosi cha, kweni waŵanaŵaniyanga mbwenu mo wangakambiya Yosefi nkhani yeniyi kweniso vo vatingi vichitikengi.

Tikayika cha kuti Yosefi wakhumbisiskanga kuwona Mariya chifukwa wangutuwapu kwa myezi yitatu. Ŵati akumana, Mariya watenere kuti wangumukambiya kuti we ndi nthumbu. Iyu watenere kuti wanguyesesa kumukonkhoske kuti mzimu wakupaturika waku Chiuta ndiwu unguchitiska kuti waje ndi nthumbu. Namwi mungawona kuti venga vakusuzga kuti Yosefi wavwisi kweniso kuti wagomezgi nkhani yeniyi.

Yosefi waziŵanga kuti Mariya wenga munthukazi wamampha kweniso wenga ndi mbiri yamampha. Ndipu iyu wamuyanjanga ukongwa. Chinanga kuti wangumukonkhoske vo vinguchitika, kweni Yosefi waŵanaŵananga kuti Mariya wangupaskika nthumbu ndi munthulumi munyaki. Mwaviyo, Yosefi wanguŵanaŵana kuti wamupati mwachisisi chifukwa wakhumbanga cha kumulengesa kweniso kuti wabayiki. Pa nyengu iyi, wo apangana kuti atoranengi, ŵanthu aŵawonanga kuti mbakutorana. Mwaviyo,  pakhumbikanga kalata kuti amalisi phanganu lawu.

Pavuli paki, Yosefi wachiŵanaŵaniya nkhani yeniyi, wangugona tulu. Ndipu mungelu waku Yehova wanguza kwaku iyu mu malotu ndipu wangumukambiya kuti: “Ungawopanga cha kuto Mariya kuti waje muwolu waku, chifukwa nthumbu yo wenayu nja mzimu wakupaturika. Iyu wazamubala mwana munthulumi ndipu uzimupaski zina lakuti Yesu, chifukwa wazamutaska ŵanthu ŵaki ku maubudi ngawu.”—Mateyu 1:20, 21.

Yosefi wati wayuka, wangukondwa ukongwa chifukwa wanguziŵa uneneska wa nkhani yeniyi. Iyu wanguswera cha kuchita vo mungelu wangumukambiya. Ndipu wangumuto Mariya ndi kuluta nayu kunyumba kwaki. Venivi vinguwovya ŵanthu kuziŵa kuti sonu Yosefi ndi Mariya atorana. Kweni Yosefi wakugonanapu cha ndi Mariya pa nyengu yosi yo wenga ndi nthumbu yaku Yesu.

Pati pajumpha myezi, Yosefi ndi Mariya yo wenga wakuvuka ndi nthumbu, angusoka kutuwa ko ajanga ku Nazareti. Kumbi yiwu akanga nunkhu chifukwa pa nyengu iyi Mariya wenga pafupi kuchira?