MARIYA LINO ULAAMYEZI YONE KAMITIDE. CAKUTADOONeka muliyeeyede kuti naakamita-mita wakaunkide kukuswaya musazinyina Elizabeta kucooko catulundulundu ca Judaya icili kumusanza. Pele lino Mariya wapiluka kwabo ku Nazareta. Ooko bantu boonse lino-lino balazyiba kuti ulaada. Amuyeeye buyo mbocamupenzya kuyeeya makani aaya!

Icapa kuti ciindile kubija ncakuti Mariya ulisinkilidwe kumusankwa wankobazwa imubezi wazina lya Josefa. Kumane ulizyi kuti kweelana a Mulawo wa Leza ngwaakapa bana Israyeli, imusimbi uusinkilidwe kumusankwa umwi pele cakuliyandila iwoonana amusankwa umbi weelede kujaigwa kwiinda mukupwaigwa mabwe. (Deuteronomo 22:23, 24) Aboobo nokuba kuti Mariya tanaakacita bwaamu, kulangilwa kuti ulilibilikide kuti naa ulamupanduluda buti Josefa kujatikizya mbwaakamita alimwi acitimucitikile.

Mariya tanaaliko kwamyezi yotatwe, aboobo cakutadooneka Josefa uliyandide kumubona. Nobabonana, kulangilwa kuti Mariya wamwaambila mbwabede, alimwi kweelede kuti wasoleka kumupanduluda kabotu-kabotu kuti wakamita kwiinda mumuuya uusalala wa Leza. Nokuba boobo, mbubonya mbomuzyi, makani aaya amuyumina kapati Josefa kwaamvwisya alimwi akwaasyoma.

Josefa ulizyi kuti Mariya musimbi uulilemeka kabotu akuti ujisi mpuwo mbotu. Alimwi ulamuyanda kapati. Pele, nokuba kuti wamupanduluda mbwaabwene makani, walo Josefa uyeeya kuti da ndyajisi Mariya ndyamusankwa umbi buyo. Nokuba boobo, Josefa tayandi kuti Mariya ajaigwe naa kuusyigwa nsoni kubuleya; aboobo wasala kuti amuleke buyo kumbali. Ciindi eeco, bantu bamvwene kukwatana bakali kubonwa kuti balikwetene kale, aboobo kwakali kuyandika kuti balekane buya kutegwa baanguluke.

 Buzuba bumwi, Josefa nali mukuyeeya makani aaya, zyamutola ŋonzi. Mungelo wa Jehova walibonya kulinguwe muciloto akumwaambila kuti: “Utayoowi kumubweza mukaintu wako Mariya akumutola kuŋanda, nkaambo kumita nkwamitide nkwamuuya uusalala. Uyoozyala mwana musankwa eelyo ukamuulike zina lyakuti Jesu, nkaambo uyoofwutula bantu bakwe kuzibi zyabo.”​—Matayo 1:20, 21.

Eelo kaka Josefa wakkomana kapati naabuka kubona kuti makani aaya lino asalazyigwa! Aboobo, cakutawaya-waya wacicita eeco ncaamulailila mungelo. Watola Mariya kuŋanda yakwe. Eeyi nintaamu yaabuleya iitondezya kuti bakwatana, kuti Josefa a Mariya lino mbanabukwetene mumulawo. Nokuba boobo, ciindi coonse Mariya namitide Jesu, Josefa kunyina naaonana anguwe.

Nokwainda myezi iili mbwiibede, Josefa a Mariya, lino uulaafwaafwi kutumbuka, balibambila lweendo lwakuzwa kuŋanda yabo iili ku Nazareta. Ino baunka kuli aaciindi eeci mbwaanga Mariya ulaafwaafwi kutumbuka?