Ko fa nei a masina o Malia. Masaua ne koe me i te taimi ne fatoā faitama ei a ia, ne āsi atu tou fafine ki tena kāiga ko Elisapeta i koga maugā o Iuta i te feitu ki saute. Kae ko oti nei ne toe foki atu a Malia ki tena fale i Nasaleta. Kae ko pili o iloa ne tino katoa i a ia ko faitama. Mafaufau la ki te tulaga fakaalofa ka oko atu ki ei tou fafine!

Kae e sili atu foki i te faigata, me ko oti ne ‵sai feagaiga a Malia ke avaga ki te kamuta, ko Iosefa. Ne iloa ne tou fafine me e ‵tusa mo te Tulafono a te Atua ki te kau Isalaelu, so se fafine telā e ‵sai feagaiga ki se tagata kae ko lotomalie ke ‵moe fakatasi a ia mo te suā tagata, e ‵tau o peipei ki fatu ke mate. (Teutelonome 22:23, 24) Faitalia me ne seki aofia a Malia i amioga fakatauavaga sē ‵tau, kāti ko mafaufau tou fafine me ka fakamatala atu pefea ne ia ki a Iosefa me i a ia ko faitama, mo mea ka iku mai i ei.

Ne galo atu a Malia mai te fa‵kai i se tolu masina, telā e iloa ei ne tatou me ka fiafia malosi a Iosefa ke toe fetaui lāua. I te taimi ne fetaui ei lāua, kāti ne fakailoa atu ne Malia tena tulaga, mai te taumafai malosi ke fakamatala atu me ko faitama a ia e auala i te agaga tapu o te Atua. Kae e mafai o maina ‵lei koe, me se mea faigata ‵ki eiloa ke malamalama kae talitonu a Iosefa ki ei.

E iloa ne Iosefa i a Malia se fafine ‵lei kae ‵gali foki ana uiga. Kae ne alofa malosi tou tagata ki tou fafine. Kae faitalia eiloa ana fakamatalaga, ne foliga eiloa ki a Iosefa me ne faitama a ia i se isi tagata. Ne seki manako a Iosefa ke peipei tou fafine ki fatu ke mate io me ke fakamāsiasi a ia i mua o nisi tino; tela la, ne fakaiku aka ne ia i tena mafaufau ke ‵tala lēmū te lā feagaiga. I aso konā, ne ma‵natu aka a tino me i tino kolā ne ‵sai feagaiga e fai pelā me ko avaga, kae ne ‵tau o ‵tala te feagaiga ke taofi i ei te ‵saiga o te feagaiga.

Fakamuli ifo, i te taimi koi mafaufau ei a Iosefa ki  mea konei, ne moe a ia. Kae ne fakasae atu te agelu a te Atua ki a ia i se moemiti, ana muna: “Sa mataku o fai a Malia mo fai tau avaga, i te mea ko faitama a ia i te agaga tapu. Ka fanau mai ne ia se tama tagata, kae ka fakaigoa ne koe a ia ki a Iesu, me ka fakasaoloto ne ia ana tino mai i olotou agasala.”—Mataio 1:20, 21.

I te taimi ne ala mai ei a Iosefa ne fiafia malosi tou tagata me ko malamalama a ia i te mea tenā! Ne fai fakavave eiloa ne ia a te mea telā ne fakatonu atu ne te agelu. Ne ave ne ia a Malia ki tena fale. A te faiga tenā i mua o nisi tino, ne fai pelā me se sauniga o te fakaipoipoga, kae ne fakailoa atu i ei me ko oti nei ne fakaipoipo a Iosefa mo Malia. Kae ne seki ‵moe fakatasi eiloa a Iosefa mo Malia i te taimi koi nofo ei a Malia mo tena tinae i a Iesu.

I te fia o masina mai tua ifo, ne ‵tau o fakatoka ne Iosefa mo Malia, telā ko tai fanau aka eiloa, se malaga ke olo atu ki se isi koga mai i te lā fa‵kai ko Nasaleta. Tefea te koga ne ‵tau o olo atu lāua ki ei, i te taimi ko pili aka eiloa o fanau a Malia?