Saahivira myeeri mithanu Maria orupanle ene. Muupuwele wira myeeri soopacerya orupanle ene aahimuxukurya Elizabeti, mmusi awe. Elizabeti aakhala okuusini wa oYudeya, muttetthe wowaatta myaako. Masi, Maria aahitthikela owannyawe oNazarethi. Tthiri Maria aahixanka vanceene! Maana atthu anceene yaamusuwela wira owo oorupala.

Etthu yaamwiiriha Maria oxanka vanceene, okhala wira aahaakameliwa ni kalapintero iitthaniwa Yosefe. Nave Maria aahisuwela wira Nlamulo Muluku aavanhe awe aIsarayeli, naahimya wira muthiyana oowaakameliwa arupa ni mulopwana mukina, aahaana ovonyakasiwa maluku mpakha okhwa. (Otumererya 22:23, 24) Maria aanisuwela wira khaarumpe ni mulopwana. Hata vari siiso, aahixanka moota woomutthokiherya Yosefe mwaha ole ni itthu saarowa okhumelela.

Maria aahiviriha myeeri miraru ori ene muttetthe mukina, nto ninnikupali wira Yosefe aahinkheliwa ni yena. Vaavo yaakumanne aya, Maria aahimuleela mukhalelo awe, iimananihaka omutthokiherya wira aarupanle okhaliheriwaka ni munepa wootteela wa Muluku. Tthiri, vaaninvila Yosefe okupali ele aaleeliwa awe.

Yosefe aahisuwela wira Maria muthiyana ooreera murima ni aarina mweettelo wooloka. Nave Yosefe aanimphenta vanceene. Nnaamwi Maria aamutthokihenrye, Yosefe onoona wira Maria aarupalihiwe ni mulopwana mukina. Masi Yosefe khaaphavela wira Maria ovonyakasiwe maluku mpakha okhwa aahiiso omuulihiha muru. Tivonto aahuupuwela omwalana ohisuweliwe.  Okathi ole, atthu oowaakamelana yaathokoreriwa ntoko aroothelana, nto omwalana waataphulela ohiya waakamelana.

Nuumala-vo, Yosefe aahirowa orupa nlelo uupuwelelaka mwaha ole. Nlaikha na Yehova naahimukhumelela Yosefe moolohani, khumuhimeerya wira: “Nyuwo, Yosefe, mwana a Davidi, muhòvelelé omwakhela Maria okhala mwar’inyu: mwana orupaliwe ni yowo onrwa” wa munepa wootteela. Nave naahincererya nriki: “Maria onomuyara mwana, yowo munrowanyu onvaha nsina na Yesu: tthiri uwo onowòpola atthu awe sottheka saya”.—Matheyo 1:20, 21.

Vaavo Yosefe aavennye awe, aahixukhurela vanceene! Moohipisa, Yosefe aahimukuxa Maria ntoko aaleeliwa awe ni nlaikha. Okhala wira Yosefe aahimukuxa Maria omurowanaka owannyawe, eyo yaari ethoonyeryo yaasuweliha atthu otheene wira yaahithelana. Masi, Yosefe khaarupanne mpakha Maria omuyara Yesu.

Myeeri saattharelana, Yosefe ni Maria yaahaana wiilokiherya wira yeette mukwaha woorakama akhumaka elapo aya oNazarethi. Masi yaarowa opuro xeeni, variki Maria aahanle oyara?