Upat ka bulan na nga burod hi Maria. Hinumdumi nga han siyahan nga mga bulan han iya pagburod inukoy hiya ha iya paryente nga hi Elizabeth ha kabungtoran han Judea ha sur. Pero yana inuli na hiya ha Nazaret. Diri mag-iiha, hibabaroan han mga tawo nga burod hiya. Hunahunaa la kon mationan-o kakuri para ha iya an sitwasyon!

Mas makuri pa gud kay karaslon hi Maria ha panday nga hi Jose. Ngan maaram hiya nga ha Balaud han Dios ha Israel, an babaye nga karaslon nga tinuyo nga nakighilawas ha iba nga lalaki kinahanglan batuhon tubtob nga mamatay. (Deuteronomio 22:23, 24) Pero bisan kon waray magbuhat hin imoral hi Maria, posible nga naghunahuna hiya kon paonan-o isasaysay kan Jose an iya pagburod ngan kon ano an mahitatabo.

Tulo ka bulan nga waray hi Maria, salit sigurado nga karuyag gud ni Jose nga makita hiya. Pagkita nira, posible nga ginsumatan ni Maria hi Jose han nahitabo, bangin ginhimo niya an ngatanan basi isaysay nga nagburod hiya pinaagi han baraan nga espiritu han Dios. Kondi sugad han mahuhunahuna mo, makuri gud para kan Jose nga masabtan ito ngan tumoo hito.

Maaram hi Jose nga maopay nga babaye hi Maria ngan may maopay nga reputasyon. Hinigugma gud hiya ni Jose. Pero bisan pa han iginsaysay ni Maria, baga hin para kan Jose, magbuburod gud la hiya pinaagi hin iba nga lalaki. Diri karuyag ni Jose nga batuhon hi Maria tubtob nga mamatay o maalohan ha publiko; salit nagdesisyon hiya pakigdiborsyo ha iya hin sekreto. Hito nga panahon, an mga may kasabotan ha pagpakasal ginhuhunahuna nga mag-asawa na, salit kinahanglan an diborsyo basi tapuson an kasabotan.

Katapos, samtang ginhuhunahuna pa ni Jose ini nga mga butang, nahingaturog hiya. Usa nga anghel ni Jehova an nagpakita ha iya ha inop ngan nagsiring: “Ayaw kahadlok nga dad-on ha imo balay hi Maria nga imo asawa, kay burod hiya pinaagi han baraan nga espiritu. Manganganak hiya hin lalaki ngan pagngangaranan mo hin Jesus, kay hiya an magtatalwas han iya katawohan tikang ha ira mga sala.”—Mateo 1:20, 21.

Pagmata ni Jose, nalipay gud hiya nga nagin matin-aw na ha iya an ngatanan! Ginbuhat niya dayon an ginsiring han anghel. Gindara niya hi Maria ha iya balay. Sugad ini hin seremonya ha kasal nga nagpapakita ha publiko nga mag-asawa na hira. Pero waray makighilawas hi Jose kan Maria samtang burod hiya kan Jesus.

Paglabay hin pipira ka bulan, hi Jose ngan hi Maria nga hirani na manganak, kinahanglan magbiyahe tikang ha Nazaret. Mapakain hira hito nga panahon nga tipag-aranak na hi Maria?