KAPITE 4
Kua Faitama Ia Malia Kaʼe Heʼeki ʼOhoana
-
ʼE FAKAHA AGE E MALIA KIA SOSEFO TANA FAITAMA
-
ʼE ʼOHOANA IA MALIA MO SOSEFO
Ko te mahina fa ʼaeni ʼo Malia. ʼE ke manatuʼi, ʼi tana kamata faitama neʼe nofo mo tona kaiga ko Elisapeta ʼi te ʼu moʼuga ʼo Sutea. Kaʼe neʼe toe liliu leva ki tona ʼapi ki Nasaleti. Neʼe lagi lahi tana tuʼania! He neʼe kua vave ha tona faitama.
Neʼe kua teu ʼohoana ia Malia mo Sosefo, te tagata tufuga ʼakau ʼo te kolo. Pea neʼe ina iloʼi, ʼi te Lao ʼae neʼe foaki e te ʼAtua ki Iselaele, ko he fafine neʼe kua teu ʼohoana mo he tagata kaʼe neʼe ina tali ke ina fai he ʼu felaveʼi fakasino mo he tahi age tagata, neʼe tonu ke tuki makaʼi ʼo kaku ki tona mate. (Tetelonome 22:23, 24) Koia, logo la neʼe mole fai e Malia he aga heʼe ʼaoga, kaʼe neʼe ina lagi fakakaukauʼi pe ʼe feafeaʼi anai tana fakamahino age kia Sosefo tana kua faitama. Pea neʼe mole ina iloʼi pe kotea anai te meʼa ʼae ka hoko.
Neʼe mahina tolu te puli ʼa Malia, pea ʼe mahino ia neʼe kua toe fia sio ia Sosefo ki ai. ʼI tanā toe felaveʼi ʼaia, neʼe lagi fakaha age e Malia ki ai tana kua faitama, mo faiga ke ina fakamahino age neʼe faitama ʼaki te laumalie maʼoniʼoni ʼo te ʼAtua. Kaʼe ʼe mahino ia, neʼe ko he faʼahi neʼe faigataʼa kia Sosefo hana mahino pea mo tui ki ai.
Neʼe iloʼi e Sosefo ko Malia neʼe ko he fafine ʼe lelei pea neʼe leleiʼia e te hahaʼi. Pea neʼe ʼofa mamahi ki ai. Kaʼe logo la te ʼu aluʼaga ʼaia, neʼe loto mahalohalo pe ia Sosefo neʼe faitama ia Malia ki he tahi age tagata. Neʼe mole loto e Sosefo ke tuki makaʼi ia ia ʼo kaku ki tona mate peʼe ke fakalainoaʼi ia ia e te hahaʼi. Koia, neʼe ina fakatotonu ai ke nā mavete fakafufu. ʼI te temi ʼaia, ko natou ʼae neʼe teu ʼohoana neʼe hage pe kua natou ʼosi ʼohoana, pea neʼe fakamaʼua he tohi mavete moʼo veteki te faʼahi ʼaia.
ʼI te ʼala ake ʼa Sosefo, neʼe lotofakafetaʼi ʼi tana kua mahino ki te meʼa ʼae neʼe hoko. Neʼe ina fai atu aipe te meʼa ʼae neʼe ui age e te ʼaselo. Neʼe ina ʼaumai ia Malia ki tona ʼapi. Ko te faʼahiga fai ʼaia neʼe hage pe ko he faiʼohoana, moʼo fakaha ki te hahaʼi kua nā ʼohoana. Kaʼe neʼe mole nā momoe ʼi te temi ʼae neʼe fuafatuʼi ai e Malia ia Sesu.
Hili ki ai ni mahina, neʼe tonu ke mavae ia Sosefo mo Malia mai tonā ʼapi ʼi Nasaleti. Neʼe kua lahi ʼaupito te fatu ʼo Malia. Neʼe nā olo koa kifea kaʼe kua vave fanau ia Malia?