Maríaeʼ tsʼoʼok u chukik kanpʼéel mes pʼáatak embarazadail. Kʼaʼajaktecheʼ letiʼeʼ tu máansaj le yáax óoxpʼéel mes yiknal Elisabet, u láakʼtsil, kajaʼan tu luʼumil Judeaoʼ. Baʼaleʼ suunaj tu yotoch tu kaajil Nazaret. Teʼelaʼ maʼ kun xáantal ken ojéeltaʼak embarazada. ¡Chéen tukult bukaʼaj kun suʼlaktal ken ojéeltaʼak!

Tsʼoʼoleʼ Maríaeʼ u yaʼalmaj u tsʼoʼokol u beel yéetel José, juntúul carpintero. Letiʼeʼ u yojleʼ le Ley u tsʼaamaj Dios tiʼ u kaajil Israeloʼ ku yaʼalikeʼ unaj u muruxtuntaʼal juntúul koʼolel u yaʼalmaj u tsʼoʼokol u beel, baʼaleʼ ku núupchital yéetel yaanal xiib (Deuteronomio 22:23, 24). Le oʼolal kex u yojel maʼ núupkʼebanchajaʼaneʼ, maʼ xaaneʼ maʼ tu kaxtik bix jeʼel u tsolik tiʼ José bix úuchik u pʼáatal embarazadaileʼ yéetel chiʼichnak tumen maʼ u yojel baʼax ken u beet Joseiʼ.

Maríaeʼ óoxpʼéel mes minaʼan tu kaajal, le oʼolal jach taak u yilaʼal tumen José. Le ka tu yilubaʼobeʼ Maríaeʼ tu yaʼalajtiʼ embarazada, maʼ xaaneʼ tu kaxtaj bix u yaʼaliktiʼ u kiliʼich muukʼ Dios beet u pʼáatal embarazadail. Chéen máans ta tuukul bix úuchik u talamtal u naʼatik José yéetel u creertik le baʼax aʼalaʼabtiʼoʼ.

Joseeʼ u yojel Maríaeʼ maʼ tu jáan beetik baʼax kʼaas, tumen ojéelaʼan ku bisik junpʼéel maʼalob kuxtal. Tsʼoʼoleʼ jach u yaabiltmaj. Baʼaleʼ kex ku yaʼalik María letiʼe kiliʼich muukʼ beet u pʼáatal embarazadailoʼ, Joseeʼ tu tukleʼ uláakʼ xiib beete. Joseeʼ maʼ u kʼáat ka muruxtuntaʼak Maríaiʼ mix ka u paj u suʼtal tu táan u maasiliʼ, le oʼolal tu tuklaj u x-mukul divorciarkuba tiʼ. Teʼ kʼiinoʼob jeʼeloʼ juntúul xiib u yaʼalmaj u tsʼoʼokol u beel yéetel juntúul x-chʼúupaleʼ ku yilaʼal bey íichamtsil  yéetel atantsileʼ, le oʼolal kʼaʼabéet u divorciarkubaʼob utiaʼal maʼ u seguer u biskubaʼob.

Le táan u tuklik José baʼax ken u beeteʼ bin wenel. Ichil u wayakʼeʼ tu yilaj u ángel Jéeoba, ka aʼalaʼabtiʼ: «Maʼ a chʼaʼik saajkil a bisik María a watan ta wotoch tumen yoʼolal kiliʼich muukʼ pʼáat embarazadail. Letiʼeʼ yaan u yantal juntúul u chan hijo, Jesús unaj a tsʼáaik u kʼaabaʼ, tumen letiʼ kun salvartik u kaajal tiʼ u kʼebanoʼob» (Mateo 1:20, 21).

Ka aaj Joseeʼ maas maʼ chiʼichnakiʼ, tumen tsʼoʼok u yojéeltik u jaajil. Tu séebaʼanileʼ tu beetaj le baʼax aʼalaʼabtiʼ tumen le angeloʼ. Ka tu bisaj María tu yotoch. Lelaʼ tu yeʼesaj tiʼ u maasil tsʼoʼok u tsʼoʼokol u beel yéetel María. Baʼaleʼ maʼ núupchilaj yéetel María táanil tiʼ u síijil Jesusiʼ.

Ka máan wa jaypʼéel meses, le taʼaytak u síijil u chaambal Maríaoʼ, kʼaʼabéetchaj u bin yéetel José tiʼ junpʼéel kaaj náach. ¿Tuʼux túun kʼaʼabéetchaj u binoʼob le taʼaytak u síijil u chaambal Maríaoʼ?