Roma Nɔ Yemi ɔ nya matsɛ Kaisare Augusto fa ke a kane nihi tsuo ngɛ e nɔ yemi ɔ sisi nɛ a ngma a biɛ. Lɔ ɔ he ɔ, e he ba hia nɛ Yosef kɛ Maria nɛ a hia blɔ kɛ ya Betlehem tɔɔ, ngɛ Yerusalem dɔsi je, ngɛ he nɛ a fɔ Yosef ngɛ ɔ.

Nihi babauu ba Betlehem konɛ a ba ngma a biɛ. He nɛ Yosef kɛ Maria maa hwɔ ɔ pee dengme, lɔ ɔ he ɔ, tsu nɛ a lɛɛ tejihi kɛ lohwe kpahi ngɛ mi ɔ ji he nɛ a ná. Lejɛ ɔ nɛ a fɔ Yesu ngɛ. Maria ngɔ bo kɛ blaa lɛ, nɛ e kɛ lɛ fɔ lohwe ɔmɛ a niye ní daka ko mi.

E maa pee kaa Mawu lɛ ha nɛ Kaisare Augusto fa kaa a kane nihi nɛ a ngma a biɛ ɔ nɛ. Mɛni he je? Ejakaa lɔ ɔ ha nɛ a fɔ Yesu ngɛ Betlehem, he nɛ a fɔ e nɛnɛkasowa Matsɛ David ngɛ ɔ. A gba kɛ fɔ si momoomo kaa a ma fɔ Matsɛ nɛ a wo e he si ɔ ngɛ ma nɛ ɔ mi.​​—Mika 5:2.

Nyakpɛ nɔ́ ko nɛ he hia hu ya nɔ ngɛ jamɛ a nyɔ ɔ mi nɔuu. Kane ko kpɛ ngɛ to hyɛli komɛ nɛ a ngɛ nga nɔ ɔ a nɔ. Yehowa hɛ mi nyami lɛ kpɛ pue a nɔ ɔ nɛ! Mawu bɔfo ko de to hyɛli ɔmɛ ke: “Nyɛ ko ye gbeye! I hɛɛ manye munyu nɛ ma ha Israel ma a tsuo ma ná bua jɔmi babauu kɛ ha nyɛ. Mwɔnɛ ligbi nɛ ɔ, a fɔ nyɛ yi wami helɔ, Nyɔmtsɛ Kristo ɔ ngɛ David ma a mi! Nɔ́ nɛ nyɛɛ kɛ maa le kaa ye sane ɔ ngɛ mi ji, nyɛ maa na bimwɔyo nɛ a kɛ bo blaa lɛ, nɛ hwɔɔ si ngɛ lohwehi a niye ní daka mi.” Si kake too ɔ, hiɔwe bɔfohi fuu ba piɛɛ bɔfo ɔ he, nɛ a de ke: “Hɛ mi nyami ha Mawu ngɛ hiɔwe lokoo, nɛ he jɔmi nɛ ba zugba a nɔ ha nihi nɛ e náa a he tsui ɔ.”​​—Luka 2:10-14.

Benɛ Mawu bɔfo ɔmɛ je ɔ, to hyɛli ɔmɛ de a sibi ke: ‘Nyɛ ha nɛ waa ya Betlehem, nɛ wa ya hyɛ nɔ́ nɛ ba, nɛ Yehowa je kɛ tsɔɔ wɔ nɛ ɔ.’ (Luka 2:15) Oya nɔuu nɛ a je, nɛ a ya na bimwɔyo Yesu ngɛ he nɛ bɔfo ɔ tsɔɔ mɛ kaa a maa na lɛ ngɛ ɔ. Benɛ to hyɛli ɔmɛ gba nihi nɛ a ngɛ lejɛ ɔ nɔ́ nɛ bɔfo ɔ de ɔ, mɛ tsuo a nya kpɛ a he. Maria bua jɔ nɔ́ nɛ to hyɛli ɔmɛ de ɔ he, nɛ e kɛ to e yi mi.

Nihi fuu he ye kaa a fɔ Yesu ngɛ December 25 nɔ. Se ngɛ Betlehem ní ɔmɛ a mi ɔ, ke e su December a, hiɔmi nɛɛ wawɛɛ, nɛ fĩɛ hu yee. Be komɛ a mi ɔ, snoo po nɛɛ ngɛ lejɛ ɔ. Ke e su be kaa kikɛ ngɛ jeha a mi ɔ, to hyɛli be nyɛe nɛ a kɛ a tohi maa hi nga nɔ nyɔ mi. Jehanɛ hu ɔ, e he maa wa kaa Roma nɔ yelɔ ɔ ma de nimli nɛ bɔɔ kɛkɛ a tsɔ atua nɛ ɔ kaa a hia blɔ gagaaga ngɛ be nɛ fĩɛ yee wawɛɛ nɛ ɔ mi kɛ ya ngma a biɛ. Enɛ ɔ he ɔ, e maa pee kaa a fɔ Yesu ngɛ October mi.