Roma marka apnaqeri César Augusto emperadorajja, taqe jaqenakaw qellqayasipjjañapa sasaw mä ley apsüna. Ukatwa Joseampi Mariampejj Belén markar sarapjjañapäna, uka markajj Jerusalenat aynach toqenkänwa.

Walja jaqenakaw Belén markarojj qellqayasir sarapjjäna. Jan kawkir puriñ utjatapatjja, uywa ikiñ mä utarukiw Joseampi Mariampejj alojasipjjäna, ukanjja asnonakampi yaqha uywanakampiw ukankapjjäna. Ukanwa Jesusajj nasïna. Mariajj wawaparojj telanakampi kʼirtʼasaw (kʼiluntasaw) uywa liwañjjar iktʼayäna.

César Augusto emperadorarojja, qellqayasiñatak mä ley apsuñapatakejj Jehová Diosaw amuytʼaypachäna. Uka ley apsutapatwa Jesusajj Belén markan nasïna, rey David nayra awkipas ukanwa nasirakïna. Diosan amuytʼayat Qellqatanakarjamajja, uka markanwa Israel marka apnaqerejj nasiñapäna, uka profeciajj walja maranak nayraw qellqasjjäna (Miqueas 5:2).

¡Jesusajj naskäna uka arumajj jan armkañänwa! Anqanjja, pampankir awatirinakjjarojj mä kʼajkir qhanaw qhanjjatäna, ukasti Jehová Diosan qhanapänwa. Ukjjarojj mä angelaw awatirinakar akham säna: “Jan ajjsarapjjamti, taqe jaqenakar wal kusisiykani uka suma yatiyäwinak jumanakar yatiyiriw jutta. Jichhürojj mä salviriw jumanakatakejj Davidan markapan nasi, jupasti Cristo Tatituwa. Jumanakatakejj aka señalaw utji: telanakampi kʼirtʼat mä asu wawa jikjjatapjjäta, uywa liwañjjana” sasa. Ukatjja akatjamatwa walja angelanakajj uñstapjjäna, akham sapjjarakïna: “Diosajj alajjpachan jachʼañchatäpan, aka oraqen sumankañajj utjarakpan, khitinakatejj jupan katoqatäpki uka jaqenak taypina” sasa (Lucas 2:10-14).

Angelanakajj sarjjapjjäna ukhajja, awatirinakajj akham sasaw jupanakkam parlasipjjäna: “Belén markarojj kunjamatsa sarañasapuniwa, kunas ukan pasatayna uk uñjaniñäni, kunjamtï Jehová Diosajj yatiykistu ukhama” sasa (Lucas 2:15). Awatirinakajja, jankʼak sarasajj kunjamtï angelajj jupanakar yatiykäna ukhampunwa Jesusarojj uñjapjjäna. Asu wawar uñjasasti kunanaktï angelajj uka wawjjat jupanakar yatiykäna ukanakwa qhanañchapjjäna. Kunanaktï awatirinakajj sapkäna ukanak istʼasasti, taqeniw musparapjjäna. Mariajja uka arunak sum katoqasïna, chuymapanwa ukanakat amuykiparakïna.

Jesusajj 25 de diciembre urunwa nasïna sasaw waljanejj sapjje. Ukampis Belén uksa toqenakanjja, diciembre phajjsejj wali thayawa, jallus wal purinti, yamas awisajj khununtiwa. Ukhamajj uka wali thaya phajjsinjja, uywa awatirinakajj janiw jaya pampanakan ikipkaspänti. César Augusto emperadoras janirakiw jupar kutkatasiñ munir jaqenakarojj ‘qellqayasir sarapjjam’ sasajj maykaspänti. Amuyatajja, Jesusajj janiw diciembre phajjsin naskpachänti, jan ukasti octubre phajjsinwa naspachäna.