Kaisa Augustô, ñane nkoñ Rôma, a nkit le bôt bobasôna ba nlama tila môl i kaat ñañga. Jon Maria bo Yôsep ba nlama ke i tison het ba bi gwééne, hala wee i Bétléhém, i nwelmbok i Yérusalem.

Ngandak bôt i yé i Bétléhém inyu tilba. Mpom homa Yôsep bo Maria ba nléba inyu tégbaha u i yé ndap het bilém bi bé nañle. Ha nyen Yésu a ngwéé. Maria a nlép nye ni mabadô, a niñ nye i homa bilém bi njél.

Ibabé pééna, Djob nyen a ntinde Kaisa Augustô i ti oda le bôt ba tila môl map. Inyuki? Inyule hala a bi boñ le Yésu a gwééne toi i Bétléhém, tison i sôgôlsôgôl wé, Kiñe David. Ntandaa ngéda i bisu, Bitilna bi bi kal le mu i tison i nyen Ñane ba bi bôn a nlama gwéé.​—Mika 5:1.

Kinje u u tôbôtôbô! Nyoo nwom, mapubi ma ma nlôôha bai ma mpémél ntôñ u batééda mintômba. Lipémba li Yéhôva li! Añgel i Djob yada i nkal batééda mintômba le: “Ni kon bañ woñi, nuna-ki! Me yé i añle bé ñañ nlam u ngandak maséé bôt bobasôna b’a kôhna. Inyule i len ini, ntohol a ngwéé inyu nan i tison i David, nyen a yé Kristô, Nwet. Yimbne inyu nan ini: N’a koba nkéñéé man u niñi i jéhne bilém, nlébék ni mabadô.” Kunda yada, ngandak biañgel i mpam, i kal le: “Lipém li ba ni Nyambe nyoo ngingii; hana isi, nsañ u ba ni bôt ba nlémél nye.”​—Lukas 2:10-14.

Kiki biañgel bi nke, batééda mintômba ba kalna bo ni bo le: “Bôga bés, di kenek i Bétléhém, di tehe jam li ntagbe nyoo, li Yéhôva a mboñ le di yi.” (Lukas 2:15) Ni bo ba pala ke, ba koba nkéñéé man u niñi homa añgel i nkal bo. I ngéda batééda mintômba ba ñañal i jam añgel i nkal bo, i bôt bobasôna ba yé ha, ba nhel. Maria nye a ntééda bipôdôl bi gwobisôna, a hegek pék mu ñem wé inyu tibil nok kii bi nkobla.

I len ini, ngandak bôt i nhoñol le Yésu a bi gwéé i hilo 25 hi sôñ Libuy li nyéé. I Bétléhém, sôñ Libuy li nyéé i yé sôñ nop ni lihep. Ngim mangéda, neige i yé i kwo. Ha ngéda i, batat mintômba ba nla bé tégbaha u i nwom ni bibémba gwap. Jam lipe li yé le, ñane Rôma a bé bé le a nyégsa bôt ba ba bi bôdôl ndogbene nye i ke liké li ngandak dilo ni nop ndik inyu tila jôl. Jon, i nene le Yésu a bi gwéé i sôñ Biôôm.