An emperador kan Imperyo nin Roma na si Cesar Augusto nagbuot na an gabos dapat na magparehistro. Kaya kaipuhan na magpasiring ni Jose asin ni Maria sa siyudad na namundagan ni Jose, an Betlehem, sa timog kan Jerusalem.

Dakul na tawo an yaon sa Betlehem para magparehistro. An solamenteng nakuang madadagusan ni Jose asin ni Maria iyo an sarong kuwadra, kun sain piglalaom an mga asno asin iba pang hayop. Duman namundag si Jesus. Pinatos siya ni Maria nin purupidasong tela asin ihinigda sa sarong bahugan, an piglalagan nin kakanon para sa mga hayop.

Sinigurado nin Diyos na ipapaluwas ni Cesar Augusto an pagbuot na ini para sa pagparehistro. Taano? Huling pinagin posible kaini na mamundag si Jesus sa Betlehem, an ginikanan na banwaan kan apuon niyang si Hading David. Haloy nang ihinula kan Kasuratan na sa siyudad na ini mamumundag an ipinanugang Tagapamahala.—Mikas 5:2.

Mahalagang banggi nanggad idto! Duman sa luwas, may maliwanagon na ilaw na nagsirang sa palibot nin sarong grupo nin mga pastor. Iyo idto an kamurawayan ni Jehova! Saro sa mga anghel nin Diyos an nagsabi sa mga pastor: “Dai kamo matakot, huli ta uya! may ipinapahayag ako sa saindo na maugmang bareta na magtatao nin dakulang kagaya-gayahan sa gabos na tawo. Huli ta ngunyan sa siyudad ni David, may ipinangaki sa saindo na sarong paraligtas, an Cristo na Kagurangnan. Asin ini an sarong tanda para sa saindo: Manunumpungan nindo an sarong umboy na napapatos nin purupidasong tela asin nakahigda sa bahugan.” Bigla na sana, dakul pang anghel an nagpahiling asin nagsarabi: “Kamurawayan sa Diyos sa kaitaasan, asin sa daga katuninungan sa mga tawong nagkakamit kan saiyang marahay na buot.”—Lucas 2:10-14.

Pakahali kan mga anghel, nag-urulay-ulay an mga pastor: “Magduman na kita sa Betlehem asin hilingon ta kun ano ining pangyayari na ipinaisi ni Jehova sa sato.” (Lucas 2:15) Naghidali sinda asin nanumpungan an bagong mundag na si Jesus sa lugar mismo na sinabi kan anghel. Kan iistorya kan mga pastor an sinabi sa sainda kan anghel, nagngaralas an gabos na nakadangog kaiyan. Isinaisip ni Maria an gabos na tataramon na ini asin hinurop-hurop kun ano an kahulugan kaiyan.

Dakul na tawo ngunyan an naniniwala na namundag si Jesus nin Disyembre 25. Pero sa Betlehem, mauran asin malipot pag Disyembre. Kun minsan, nag-uuran pa ngani nin niyebe. Sa panahon na iyan kan taon, harayong mangyari na an mga pastor magdamlag na nasa luwas kaiba an saindang mga aripumpon. Saro pa, harayo an posibilidad na ipagbuot kan emperador kan Roma na magbaraklay pa nin nagkapirang aldaw sa kasagsagan nin tiglipot para sana magparehistro an sarong banwaan na gusto nang magrebelde sa saiya. Malinaw na namundag si Jesus sa panahon na bako pang malipot, mga bulan nin Oktubre.