César Auguste, njô bôte ya Rome a tyi’iya na bôte bese ba yiane tilibane môé map e kalate. Ajô te, Joseph ba Marie ba yiane ke nlame Joseph a nga bialé, tisone ya Bethléhem, e sud ya Jérusalem.

Abui bôt e ne Bethléhem asu élañe bôt. Susu’a vôme Joseph ba Marie be ne ke tabe a ne abemba, vôme ba ba’ale binyaka a betite bevok. Nne Yésus a bialé valé. Marie a vute nye bindelé, a bôé nye éwolo ba futi betit bidi.

Zambe nnye a yiane bo mvus atiñe César Auguste a nga kuli. Amu jé bia jô nalé? Amu nalé a volô na Yésus a bialé e Bethléhem, vôme Njô bôte David, émvame jé, a nga bialé. Mimfufube mintilan mi nga jô ayab éyoñ ôsusua na, Njôô Yéhôva a nga ka’ale, a ye bialé tison éte.​—Michée 5:2.

Za aval mbamba alu di! Nté beba’ale mintômba be ne afup, nde beta éfufup a bômane be. A ne étôto’o Yéhôva! Ange Yéhôva a jô beba’ale mintômba na: “Te koane woñ; amu me azu mia mbamba foé ya bôte bese, be aye dañe vak: amu Nyii bôt a te bialé mia nlame David den, nnye a ne Christ Tate. Jam de aye bo mia ndem, e ne na, mi aye yen nkeñelé mon mvutane bindélé, ô bô éwolo vôm binyaka bi wô’ô bo bi ja’ak.” Atemeteme na, nsamba beange ba sulan a jô na: “Duma e bo’o Zambe yôp été, a mvo’é é bo’o bôte ya si nyô.”​—Luc 2:10-14.

Éyoñe beange be keya, nde beba’ale mintômba ba jô bebiene na: “Nke’ane Bethléhem, bi ke yene jam de ate bo wôé, nde Tate a te kate bia.” (Luc 2:15) Be nji jañele éyoñ, ba ji’a ke, a koone nkeñelé mone Yésus fo’o ve vôm ange a nga kate be na ba ye koone nye. Éyoñe beba’ale mintômba ba kañete mam ange a nga kate be, bôte bese ba wô’ô mam mete be ne fe’e ne vema. Marie a nyane mejô mete mese, a bindi fe me nleme wé été.

Abui bôte da buni na, Yésus a nga bialé Ngon awôm a baa, é too melu 25. Ve jame da, Ngon awôm a baa, mveñ ja noñ e Bethléhem, aveb é ne fe. Biyoñe biziñ, neige a wô’ô ku. Biyoñe bite, beba’ale mintômba be vo’o tabe nseñ a mintômba miap. Nde fe, njô bôte ya Rome a nji be ve jô bôte be mbe be wosan éjôé jé éyoñ éte na, be wulu abui melu aveb été, na be ke élañe bôt. Ajô te, bi ne jô na Yésus a nga bialé Ngon awômô, éyoñ ayôñ é ne.