Lanperer Sezar Ogis in donn lord ki tou dimoun dan Lanpir Romen i bezwen al anrezistre. Alor Zozef ek Mari i bezwen al Betleenm, sa lavil kot Zozef ti ne. Betleenm i dan sid Zerizalenm.

I annan en kantite dimoun ki’n al Betleenm pour anrezistre. Sel landrwa ki Zozef ek Mari i gannyen pour reste i dan en pti lakaz kot bourik ek lezot zannimo i ganny mete. I lanmenm la ki Zezi i ne. Mari i anvlop li dan bann bout latwal e met li dan en loz, ki ganny servi pour met manze zannimo.

I bezwen Bondye ki ti pous Sezar Ogis pour pas sa lalwa ki bann dimoun i al anrezistre. Akoz? Parski sa ti fer li posib pour Zezi ne Betleenm, menm landrwa ki son zanset Lerwa David ti sorti. Depi lontan, Labib ti’n predir ki sa Dirizan ki ti’n ganny promet ti pou ne dan sa lavil.​—Mika 5:2.

Sa i en zour swar vreman enportan! I annan en gro lalimyer ki klere toultour en group berze ki pe reste deor dan lakanpanny. Sa i laglwar Zeova! Enn sa bann lanz i dir bann berze: “Pa bezwen per, parski mon pe anons zot en bon nouvel ki pou anmenn lazwa pour tou dimoun. Ozordi, dan lavil David, en sover in ne, li menm Kris ek Senyer. La ki mannyer zot pou rekonnet li, zot pou vwar en pti baba anvlope dan bann bout latwal dan en loz.” En sel kou, plis lanz i aparet e dir: “Laglwar i pour nou Bondye dan lesyel e lape lo later parmi bann dimoun ki annan son laprouvasyon.”​—Lik 2:10-14.

Ler bann lanz i ale, bann berze i dir avek kanmarad: “Annou al Betleenm deswit pour vwar sa ki’n arive laba parey Zeova in dir nou.” (Lik 2:15) Zot depese e ale. Laba, zot vwar Zezi ki fek ne kot sa lanz in dir zot. Ler bann berze i rakonte ki sa lanz ti’n dir zot, tou dimoun ki tande i etonnen. Mari i gard tou sa bann parol dan son lespri e tir konklizyon dan son leker.

En kantite dimoun ozordi i krwar ki Zezi ti ne le 25 Desanm. Me Desanm, Betleenm, i en landrwa ki fer fre avek en kantite lapli. Par ler i menm annan lanez. Sa letan i rar ki ou ti pou vwar bann berze pe reste deor aswar avek zot zannimo. An plis ki sa, lanperer Romen pa ti pou’n demann bann dimoun pour vwayaze pour plizyer zour dan sa gro lafreser pour al anrezistre, espesyalman akoz zot ti deza anvi rebel kont li. I paret ki Zezi ti ne an Oktob.