Hnei Kaisara Auguso, atre mus kowe la nöje Roma, hna amekötine troa e la etrune la nöjei atr asë. Matre hnei Iosefa me Maria hna tro Bethelema, traon hna hnaho Iosefa, e Ierusalema nge kolojë.

Ala nyimu la itre atr ka traqa e Bethelema. Matre casi hi la göhnë hnei Iosefa me Maria hna öhn, kolo hnë umë öni, tune la itre boliko me itre xa öni ju kö. Hna hnaho Iesu e cili, matre Maria a hakuthi nyëne ju hnei iheetr, me ami nyën ngöne la ketre trepene a i öni.

Ma hnei Akötresieti jë hna kuca, matre amekötine jë Kaisara Auguso troa e la itre atr. Pine nemen? Matre tro Iesu a mala e Bethelema, traone i Dravita Joxu, xötrapane i Iesu. Hnene lo itre Hna Cinyihan hna qaja ka hape, troa hnahone la Joxu hna thingehnaean ngöne la traone cili.—Mika 5:2.

Ketre pengöne kö la jidri cili! E trön, ngöne la itre hlapa, hna mama la lai atraqatr kowe la itre ka thupë öni, ene la lolo i Iehova. Hnene la ketre angela i Akötresie hna qaja kowe la itre ka thupë öni ka hape: “The xou kö, ke hanawang! Eni a traqa fë koi nyipunie la ketre maca ka lolo, nge nyine amadrinëne la nöjei atr asë. Enehila, ase hë hnahon ngöne la traone i Dravita la atre iamele, ene Keriso, Joxu. Nge hane hi la hatrene koi nyipunie: Tro nyipunieti a öhne la medreng hna hakuth hnei imaano lino, nge hna amekölene ngöne la trepene a i öni.” Ame hna mama pi fe la itre xa angela, öni angatr: “Atrunyi Akötresieti jë e hnengödrai, nge ame e celë fen, tingetinge hë la itre atr hna kapa hnei nyidrë.”—Luka 2:10-14.

Matre ame ju hi la kola patr hnei itre angela, itre ka thupë öni a iqajakeune ka hape: “Tro easë Bethelema eë troa wange la ewekë ka traqa, ene lo ewekë hnei Iehova hna qaja koi së.” (Luka 2:15) Angatr a tro nyimenyime ju me öhne la medreng, hmekune lo hna qaja hnene lai angela. Matre ame la angatr a qaja ju lo hna qaja hnene lai angela, itre atr e cili a hain, nge Maria a amë hutine ju e kuhu hni angeic la itre trengewekë cili, me mekune la alien.

Ala nyimu la itre atr enehila ka mekune laka, hna hnaho Iesu e 25 Diseba. Ngo ame ngöne la ijine cili, tre kola mani me hnötr e Bethelema me itre götrane xötreith, nge goi neige fe itre xa ijin. Matre thatreine kö troa lapa e trön la itre ka thupë öni, me itro si angatr. Ketre, tha tro kö la musi Roma a upe la itre atr ka icilekeu troa fek koi nyimu drai ngöne la ijine hnötr, göne hi matre sija la etru i angatr. Haawe, meköt troa mekune ka hape, hna hnaho Iesu e treu Okotropa.