Ɔrɔmu masacɛ Ogusiti ye cii di ko a ka jamana mɔgɔw bɛɛ tɔgɔw ka sɛbɛ. O kosɔn, Yusufu ni Mariyamu ka ɲi ka taga Yusufu wolodugu la Bɛtilehɛmu, Zeruzalɛmu worodugu fan fɛ.

Mɔgɔ caaman nana Bɛtilehɛmu walisa k’u tɔgɔw sɛbɛ. O kosɔn, Yusufu ni Mariyamu ma siyɔrɔ sɔrɔ yɔrɔ si fɔɔ wɛɛrɛ kɔnɔ: faliw ni bɛgɛn wɛrɛw siyɔrɔ lo. Yezu wolola o yɔrɔ lo la. Mariyamu y’a meleke ni fani ye ani k’a la bɛgɛnw ka dumunikɛminan kɔnɔ.

Siga t’a la, Ala lo ye masacɛ Ogusiti lasun a k’o cii di. Mun na an be se k’o fɔ? An be se k’o fɔ sabu o lo y’a to Yezu wolola Bɛtilehɛmu, a mamacɛ Dawuda wolodugu la. Bibulu tun kɔnna k’a fɔ ko layidu tara kuntigi min koo la, ale tun bena wolo o dugu lo la.—Mise 5:2.

O kɛra suu kabakoman yɛrɛ lo ye! Sagadɛndɛla dɔw tun be kɛnɛma ani yeelenba bɔra u kan. O yeelen tun ye Jehova ka nɔɔrɔ lo ye! Ala ka mɛlɛkɛ dɔ y’a fɔ sagadɛndɛlaw ye ko: “Aw kana siran, bari ne nana kibaru diman dɔ fɔ aw ye min bena aw ka jamana mɔgɔw bɛɛ nisɔn diya. A filɛ, bii suu nin na, Kisibaga wolola aw ye Dawuda ka dugu la, ale lo ye Ala ka Mɔgɔ wolomanin nin ye, an Matigi [Krista] lo. Aw ben’a lɔn taamasiɲɛ min fɛ, o filɛ: Aw bena denɲɛnin dɔ lanin ye kolokolo dɔ kɔnɔ, fani melekenin b’a la.” O yɔrɔnin kelen, mɛlɛkɛ caaman y’u yɛrɛ yira sagadɛndɛlaw la ani k’a fɔ ko: “Ala ka tanu sanfɛ yɔrɔjan na, hɛrɛ ka kɛ dugukolo kan a diyanamɔgɔw ye.”—Luka 2:10-14.

Mɛlɛkɛw kɔseginin kɔ, sagadɛndɛlaw y’a fɔ ɲɔgɔn ye ko: “An ka taga Bɛtilehɛmu, mɛlɛkɛ ye koo min kibaru fɔ an ye ka bɔ Matigi [Jehova] fɛ, an ka taga o filɛ.” (Luka 2:15). U teliyara ka taga. Mɛlɛkɛ ye yɔrɔ min kofɔ u ye, u tagara Yezu wolonin kura sɔrɔ yen. Sagadɛndɛlaw ye mɛlɛkɛw ka kumaw lakali minkɛ, minw y’o mɛn, u bɛɛ kabakoyara. Mariyamu y’o koo bɛɛ mara a kɔnɔ ani a tora ka miiri u la.

Bi, mɔgɔ caaman b’a miiri ko Yezu wolola desanburukalo tile 25nan na. Nka, Bɛtilehɛmu mara la, sanji be ben desanburukalo la ani nɛnɛ be yen. Tuma dɔw la, nɛzi yɛrɛ lo be ben. O wagati ɲɔgɔn na, sagadɛndɛlaw tɛna to kɛnɛma n’u ka sagaw ye forow kɔnɔ. Ka fara o kan, jamanadenw be to ka muruti Ɔrɔmu masacɛ kama. O la, a tun tɛna sɔn k’a fɔ u ye k’u ka tagamajan kɛ samiɲa wagati la ka taga u tɔgɔw sɛbɛ. Tiɲɛn na, a be komi Yezu wolola ɔkutɔburukalo la le.