Caesar Augustus, andikara Rome ọnọ ewụhọ ete kpukpru owo ẹkesịn enyịn̄ ke n̄wed. Ntre, ana Joseph ye Mary ẹka Bethlehem, obio emana mmọ emi odude ke usụk usụk Jerusalem.

Ediwak owo ẹka Bethlehem man ẹkesịn enyịn̄ mmọ n̄ko ke n̄wed. Mme owo ẹyọhọ kpukpru ebiet, n̄kukụre ebiet emi Joseph ye Mary ẹkemede ndidu edi ke ufọk ufene. Do ke Jesus amana. Mary ada ekpri ubak ọfọn̄ awan̄ enye enịm ke usịnudia ufene.

Anaedi Abasi anam Caesar Augustus ọnọ ewụhọ usịn enyịn̄ ke n̄wed emi. Ntak emi idọhọde ntre? Sia emi anam Jesus ekeme ndimana ke Bethlehem emi edide obio Edidem David, ete ete esie. N̄wed Abasi ama etetịn̄ anyan ini ko ke Andikara oro Abasi ọkọn̄wọn̄ọde edimana ke obio emi.—Micah 5:2.

Okoneyo oro enye amanade edi ata akpan usen. Mme ekpemerọn̄ emi ẹdude ke an̄wa ẹkụt un̄wana emi ayamade ọnọ mmọ. Un̄wana oro edi ubọn̄ Jehovah! Angel Abasi ọdọhọ mme ekpemerọn̄ oro ete: “Ẹkûfehe ndịk, koro, sese! ami ntan̄a eti mbụk akwa idatesịt eke edinyenede kpukpru owo nnọ mbufo, koro Andinyan̄a, emi edide Christ Ọbọn̄, amana ọnọ mbufo mfịn emi ke obio David. Ndien emi edi idiọn̄ọ eke ẹnọde mbufo: mbufo ẹyekụt nsekeyen emi ẹwan̄de ke ubak ọfọn̄ nte anade ke usịnudia ufene.” Ndien kpa idaha oro ediwak angel ẹditiene angel oro ẹtoro Abasi ẹnyụn̄ ẹdọhọ ẹte: “Ubọn̄ enyene Abasi ke ata enyọn̄, emem onyụn̄ odu ke isọn̄ ke otu mbon oro enye enyịmede.”—Luke 2:10-14.

Ke ini mme angel oro ẹnyọn̄de, mme ekpemerọn̄ oro ẹdọhọ kiet eken ẹte: “Ẹyak nnyịn isọp ika Bethlehem ikese n̄kpọ emi adade itie, emi Jehovah anamde nnyịn ifiọk.” (Luke 2:15) Mmọ ẹsọsọp ẹka ẹkekụt nsekeyen emi nte anade ke ebiet emi angel oro ọkọdọhọde mmọ. Idem akpa mme owo ke ini mme ekpemerọn̄ oro ẹtịn̄de se angel oro eketịn̄de ọnọ mmọ. Mary omụm kpukpru ikọ emi akama, onyụn̄ ekere ke esịt esie se mmọ ẹwọrọde.

Mfịn, ediwak owo ẹdọhọ ke Jesus akamana ke December 25. Edi December edi ini edịm ye ini etuep ke Bethlehem. Snow esikam edep n̄ko ndusụk ini. Ini oro, mme ekpemerọn̄ isidehedei ida erọn̄ mmọ iwọrọ an̄wa. Andikara Rome n̄ko ikpọkọdọhọke mbon emi ẹkeyomde-yom se ẹdade ẹsọn̄ ibuot ye ukara, ẹka utọ anyan isan̄ oro ke utọ ini etuep oro ẹkesịn enyịn̄ ke n̄wed. Akam etie nte Jesus akamana ke October.