Sesali Augusti he yin Ahọluigba-gán Lomu tọn, de gbedide de tọ́n dọ mẹlẹpo dona yì ze yinkọ dai. Enẹwutu, Josẹfu po Malia po dona zingbejizọnlin yì Bẹtlẹhẹm, tòdaho he mẹ Josẹfu yin jiji te, to hùwaji Jelusalẹm tọn.

Mẹsusu wẹ wá Bẹtlẹhẹm nado ze yinkọ dai. Enẹwutu, fidopo gee he Josẹfu po Malia po sọgan nọ wẹ kanlinpo he mẹ kẹtẹkẹtẹ po kanlin devo lẹ po nọ yin bibẹ do. Finẹ wẹ Jesu yin jiji te. Malia blá Jesu do avọ̀ mẹ bosọ tẹ́ ẹ do otò he mẹ kanlin lẹ nọ dùnú te de mẹ.

Matin ayihaawe, Jiwheyẹwhe wẹ na ko whàn Sesali Augusti nado de gbedide ehe tọ́n dọ mẹlẹpo ni yì ze yinkọ dai. Etẹwutu? Na ehe wẹ hẹn ẹn yọnbasi na Jesu nado yin jiji to Bẹtlẹhẹm, yèdọ to tòdaho he mẹ tọgbo etọn Ahọlu Davidi wá sọn. Biblu ko dọ dọdai sọn ojlẹ dindẹn die gbọ́n dọ tòdaho enẹ mẹ wẹ Ahọlu dopagbe lọ na yin jiji te.—Mika 5:2.

Ozán titengbe nankọ die! To gbonu, hinhọ́n daho de họ́n lẹdo pipli lẹngbọhọtọ lẹ tọn de to danji. Hinhọ́n Jehovah tọn wẹ! Dopo to angẹli Jiwheyẹwhe tọn lẹ mẹ dọna lẹngbọhọtọ lọ lẹ dọmọ: “Mì dibu blo, na, mì pọ́n! wẹndagbe de wẹ yẹn to lilá na mì gando ayajẹ daho de he gbẹtọ lẹpo na tindo go, na Mẹwhlẹngántọ de yin jiji na mì to egbé, he yin Klisti Oklunọ lọ, to tòdaho Davidi tọn mẹ. Podọ ohia de die na mì: Mì na mọ viyẹyẹ de he yin biblá do avọ̀ mẹ bo yin titẹ́ do otò de mẹ.” To ajiji mẹ, angẹli susu sọawuhia dogọ bo dọmọ: “Gigo to oji aga hlan Jiwheyẹwhe, podọ jijọho hlan mẹhe tindo ojlo dagbe to aigba ji lẹ.”—Luku 2:10-14.

To whenue angẹli lọ lẹ yì godo, lẹngbọhọtọ lọ lẹ dọna ode awetọ dọmọ: “Mì gbọ mí ni yì Bẹtlẹhẹm tlọlọ nado pọ́n nuhe jọ lọ, ehe Jehovah ko hẹn zun yinyọnẹn na mí.” (Luku 2:15) Yé yì po awuyiya po bo mọ viyẹyẹ lọ to fihe angẹli lọ dọ yé na mọ ẹn te pẹpẹ. To whenue lẹngbọhọtọ lọ lẹ dọ nuhe angẹli lọ dọna yé lẹ, awuji mẹhe sè lẹpo. Malia yí onú ehe lẹpo whlá do ayiha mẹ bo to nulẹnpọn do nuhe yé zẹẹmẹdo ji to ahun etọn mẹ.

To egbehe, mẹsusu wẹ yise dọ Jesu yin jiji to 25 décembre. Ṣigba, to lẹdo Bẹtlẹhẹm tọn mẹ to osun décembre tọn mẹ, jikun nọ ja podọ aimẹ nọ fá. To whedelẹnu, osin-agó tlẹ nọ ja. To ojlẹ owhe lọ tọn enẹ mẹ, e na vẹawu taun dọ lẹngbọhọtọ lẹ ni tin to danji to zánmẹ po lẹngbọpa yetọn lẹ po. Podọ e na vẹawu dọ Ahọluigba-gán Lomu tọn ni biọ to mẹhe susu yetọn ko nọ diọnukunsọ aṣẹpipa etọn lẹ si nado zingbejizọnlin na azán susu nado yì ze yinkọ dai to ojlẹ avivọ-whenu tọn enẹ mẹ. Enẹwutu, e họnwun dọ gblagbla osun octobre tọn mẹ wẹ Jesu yin jiji te.