Raja perintah Rome, iya nya Kaisar Augustus udah ngasuh semua orang ngerejista nama diri. Nya alai, Josep enggau Maria patut ngagai endur alai Josep ada, iya nya Betlehem ke bisi ba begian selatan Jerusalem.

Mayuh orang datai ngagai Betlehem laban deka ngerejista nama diri. Nya alai, Josep enggau Maria enda ulih tetemuka endur alai bemalam. Ketegal nya, seduai iya bemalam ba siti kandang jelu. Jesus pan ada dia. Maria malut Jesus ngena kain, lalu ngalika iya dalam dulang. Dulang nya dikena bala jelu makai.

Bup Kudus udah lama madahka, Pemerintah ti Disemaya deka ada ba Betlehem. (Mikah 5:2) Nya alai, Petara meh ke ngasuh Kaisar Agustus ngaga atur minta semua orang ngerejista diri, ngambika Jesus ulih ada ba menua asal Raja David.

Ba malam Jesus ada, mulia Jehovah manchar ngelingi seraban pengibun bedus ba padang. Siku melikat bejaku ngagai sida: “Anang takut! Aku datai mai berita manah. Berita tu deka ngasuh semua orang balat gaga ati. Seharitu, ba nengeri David, penyelamat kita, iya nya Tuan Kristus, udah ada. Tu tanda ti diberi ngagai kita: Kita deka nemu siku anak ti dibalut ngena kain, gali ba dalam dulang.” Tekala nya, seraban besai melikat ayan enggau melikat nya. Ku sida: “Muliaka Petara ti ba serega, lalu awakka orang ba dunya ti ngagaka ati Iya bulih pengelantang.”—Luke 2:10-14.

Pengudah bala melikat nya ninggalka sida lalu pulai ke serega, bala pengibun bedus nya lalu bejaku enggau pangan diri: “Aram kitai mupuk ngagai Betlehem diatu, lalu meda utai ke udah nyadi, baka ke udah dipadahka Jehovah ngagai kitai.” (Luke 2:15) Sida pan beguai-guai mupuk lalu tetemuka Jesus ke baru ada, baka ke dipadah melikat nya. Lebuh bala pengibun bedus nerangka utai ti dipadah melikat nya ngagai sida, semua orang ke ninga berasai balat alit ati. Maria nyimpan semua jaku nya dalam ati iya, lalu berundingka enggau dalam nama reti jaku nya.

Mayuh orang kemayaharitu pechaya, Jesus ada kena 25 Disember. Tang ba bulan Disember, Betlehem amat chelap laban suah ujan. Kekadang mega, bisi seleju. Ba maya nya, pengibun bedus tusah deka ngibun bedus sida ba padang maya malam hari. Pia mega, raja Rome tentu enda ngasuh orang ngaga pejalai ti jauh maya musin chelap kena ngerejista diri. Enti iya ngereja nya, orang deka angkat ngelaban iya. Kebendar iya, Jesus ada urung bulan Oktober.