Kaisali Auguste, ntotila ya Roma, me pesa nsiku nde konso muntu fwete sonikisa zina. Yo yina, yo lombaka nde Yozefi ti Maria kukwenda na Betelemi, mbanza yina Yozefi butukaka na sudi ya Yeruzalemi.

Bantu mingi me kwisa na Betelemi sambu na kusonikisa bazina. Yozefi ti Maria monaka ve kisika ya kuvanda, yo yina bo vandaka na nzo yina bo vandaka kubumba bampunda ti bambisi ya nkaka. Yezu butukaka na nzo yina. Maria me dimba yandi na bitenda mpi me ladisa yandi na kidikilu disongidila, kisika yina bo ke tudilaka bambisi madia.

Yo fwete vanda nde, Nzambi muntu salaka nde Kaisali Auguste kupesa nsiku ya kusonikisa bazina. Sambu na nki? Sambu diambu yai salaka nde Yezu kubutuka na Betelemi, mbanza ya nkaka na yandi ntotila Davidi. Masonuku tubaka na ntwala nde Mfumu yina Nzambi silaka ta butuka na mbanza yina.—Mika 5:2.

Yai mpimpa mosi ya mfunu kibeni! Na nseke, nsemo ya ngolo ke sema na nziunga ya kibuka ya bangungudi. Yo kele nkembo ya Yehowa! Wanzio ya Yehowa me zabisa bo nde: “Beno wa boma ve, sambu mono ke zabisa beno nsangu ya mbote yina ta pesa bantu yonso kiese mingi. Sambu bubu yai, na mbanza ya Davidi, bo me butila beno Ngulusi, yina kele Kristu, Mfumu. Mpi yai kidimbu sambu na beno: Beno ta mona mwana ya fioti ya bo me ziunga na lele mpi me lala na kidikilu.” Na mbala mosi, bawanzio mingi me basika mpi me tuba nde: “Nkembo na Nzambi kuna na zulu, mpi ngemba na ntoto na kati ya bantu yina Nzambi ke ndimaka.”—Luka 2:10-14.

Ntangu bawanzio me kwenda, bangungudi me tuba bo na bo nde: “Beto kwenda na Betelemi mpi beto tala mambu yina me salama, yina Yehowa me zabisa beto.” (Luka 2:15) Bo me kwenda ntinu mpi me mona Yezu yina me katuka kubutuka kaka kisika yina wanzio tubaka nde bo ta mona yandi. Ntangu bangungudi me tuba mambu yina wanzio zabisaka bo, bantu yonso yina me wa yo me yituka. Maria me wa kiese ya mingi sambu na mambu yonso yina bo me tuba mpi yandi ke yindula yo na ntima na yandi.

Bubu yai, bantu mingi ke ndimaka nde Yezu butukaka na kilumbu ya Desembri 25. Kansi na Betelemi, mvula mpi madidi ke vandaka mingi na ngonda ya Desembri. Bantangu ya nkaka nkutu, neze ke bwaka. Na ngonda yina, yo ke vandaka mpasi nde bangungudi kulutisa mpimpa ya mvimba na nseke ti mameme na bo. Diaka, yo ke monana nde ntinu ya Roma lendaka ve kulomba bantu yina vandaka dezia kukolamina yandi na kusala nzietelo ya bilumbu mingi na nsungi yina ya madidi ya ngolo sambu na kusonikisa bazina. Yo kele pwelele nde, Yezu butukaka na ngonda ya Oktobri.