Mfumu wa Bufumu bwa Bena Loma aye Kesala Augusatusa wakambizhe’mba bantu bonse banembeshe mazhina. Onkao mambo, Yosefwa ne Maliya bayile ku Betelema kwasemekejilwe Yosefwa. Muzhi wa Betelema wajinga ku kabeta ka bulenge bwa Yelusalema.

Bantu bavula bingi bayile ku Betelema na kunembesha mazhina. Onkao mambo, kipaka mo balaminanga bambongolo ne banyama bakwabo yo mpunzha yashajilepotu mwafikijile ba Yosefwa ne Maliya. Mu kino kipaka mo mwasemekejilwe Yesu. Maliya wamupombakenye mu bisapi ne kumulaajika mu kijiilamo banyama.

Luno lwajinga lunengezho lwa Lesa kuba’mba Kesala Augusatusa alenge muzhilo wa kunembesha mazhina. Mambo ka? Pa kuba’mba Yesu asemekelwe mu Betelema, muzhi mwaikalanga mushakulu wanji aye Mfumu Davida. Binembelo byaambile kala’mba ye muzhi mukasemekelwa Kalama walayilwe.—Mika 5:2.

Kyamwekele pa joja juba bufuku kyanemene bingi. Kimye bakafunga kyo bajinga mungye bufuku, kyeya kibasamijile konse konse. Kino kyeya kyajinga lukumo lwa Yehoba. Kabiji malaika wa Lesa wibabuujile’mba: “Kuba moyo ne, umvwai! Mbena kwimubuula mambo awama a lusekelo lukatampe bantu bonse o bakomvwa. Mambo lelo mu muzhi wa Davida mwimusemenwa mupulushi, aye Kilishitu Nkambo. Kino kyo kiyukilo kwi anweba: Musakutaana mwana bamupomba mu kisapi saka bamulaajika mu kijiilamo banyama.” Ponkapo kwamwekele bamalaika bavula kabiji baambile’mba: “Lukumo kwi Lesa mwiulu, ne mutende pano pa ntanda mu bantu baubilwa bibusa.”—Luka 2:10-14.

Bamalaika byo bafumineko, bakafunga besambilenga mulwabo amba: “Twayai tuye ku Betelema tukamone kino kyamweka kitusolwela Yehoba.” (Luka 2:15) Ponkapotu bayile kabiji bataine Yesu wasemwa, byonkatu bibabuujile malaika. Bakafunga byo bashimikizhe bibabuujile malaika, bonse baumvwine kino bakuminye bingi. Maliya wanemekele bingi bino byambo byonse ne kwibilangulukapo mu muchima wanji.

Bantu bavula lelo jino baitabila’mba Yesu wasemekelwe pa 25 December. Bino mu ñondo wa December, mu Betelema munoka bingi mvula kabiji mwikala bingi mashika. Kimo kimye mwikala ne mabebe. Bakafunga kechi bakonsheshe kwikala mungye bufuku na matanga abo mu uno ñondo ne. Kabiji mfumu wa bena Loma kechi wakonsheshe kwambila bantu bo ayukile’mba bakonsha kumusatukila kuba’mba bende moba avula mu uno ñondo wa mashika na kunembesha mazhina ne. Onkao mambo, kyamweka Yesu wasemekelwe mu October.