Sesare Augusto, yena mubusi wa Mubuso wa Roma, ulaezi batu kaufela kuli baiñolise. Kabakaleo, Josefa ni Maria baswanela kuya kwa muleneñi wa Betelehema kwa naapepezwi Josefa, oli kwa mboela wa Jerusalema.

Batu babañata batile mwa Betelehema kuto iñolisa. Sibaka sebakona feela kutibelela ku sona bo Josefa ni Maria ki mwa mulaka wa limbongolo ni limunanu zeñwi. Jesu upepelwa ona mo. Maria umuputela mwa lisila ni kumulobaza mwa sicelo sa limunanu.

Mulimu ulukela kuba yena yanaatahisize kuli Sesare Augusto atome mulao wo wa kuli batu baiñolise. Ki kabakalañi? Kakuli taba yeo neitahisize kuli Jesu apepelwe mwa Betelehema, ona muleneñi wahabo kuku wahae, ili Mulena Davida. Kale-kale ko, Mañolo naapolofitile kuli Mubusi yanaasepisizwe naakapepelwa mwa muleneñi wo.—Mika 5:2.

Busihu bo ki bwa butokwa luli! Liseli lelituna libeya sikwata sa balisana mwahali, babainzi mwa naheñi. Ki kanya ya Jehova! Leliñwi la mangeloi a Jehova libulelela balisana, lili: “Musike mwasaba, kakuli hamubone! Nishaela taba yende ku mina ya tabo yetuna yebakaba ni yona batu kaufela. Kakuli kacenu, mwa muleneñi wa Davida, mupepezwi mupilisi, yena Kreste Mulena. Mi ki se sisupo semuka muziba ka sona: Mukafumana mbututu yaputezwi mwa masila, yalobezi mwa sicelo.” Honafo, mangeloi amañata abonahala mi ali: “Kanya ibe mwa mahalimu ku Mulimu, mi kozo ibe fa lifasi kwa batu babashemubilwe.”—Luka 2:10-14.

Mangeloi asaya feela, balisana babulelisana, bali: “Haluyeñi cwale kwa Betelehema, luyo bona zeezahezi, zaluzibisize Jehova.” (Luka 2:15) Baakufa mi bafumana Jesu yasazo pepwa mwa sibaka sesitalusizwe ki lingeloi. Balisana habakandeka zebabulelezwi ki lingeloi, batu kaufela babateeleza bakomoka hahulu. Maria ubuluka litaba zeo kaufela, mi walinahanisisa mwa pilu yahae.

Batu babañata kacenu balumela kuli Jesu naapepilwe la 25 December. Kono mwa Betelehema kubanga ni pula ni silami mwa kweli ya December. Mi mane fokuñwi kubanga ni litwa. Mwa kweli yeo, balisana nebasike bakona kuya mwa naheñi busihu kuyo lisa mitapi yabona. Hape mwendi mubusi wa Roma naasike alaela batu bane babata kumukwenuhela kuli bazamaye mazazi amañata ka nako ya maliha kuyo iñolisa. Kubonahala kuli Jesu naapepilwe mwa October.