Kaisa Augusto, mukokeshi wa Lomo, uvua muele mukenji ne: muntu yonso uvua ne bua kudifundisha ku mikanda. Nunku Jozefe ne Mariya bavua ne bua kuenza luendu batangile ku tshimenga tshimulelela, tshimenga tshia Beteleheme, ku sud kua Yelushalema.

Bantu ba bungi bavua mu Beteleheme bua kudifundisha ku mikanda. Muaba umuepele uvua Jozefe ne Mariya mua kupeta bua kutudila mmu tshikumbi, muaba uvuabu balamina mpunda ne nyama mikuabu. Yezu wakaledibua muaba au. Mariya wakamujingila mu bilamba ne kumuladika mu tshidilu tshia nyama, muaba uvuabu belela nyama biakudia.

Nzambi ke uvua ne bua kuikala muenze bua Kaisa Augusto ele mukenji wa kudifundisha ku mikanda eu. Bua tshinyi? Bualu, bualu ebu buvua buenza bua Yezu aledibue mu Beteleheme, tshimenga tshia nkambua wende mukalenge Davidi. Mifundu ikavua miambe katshia ku kale ne: tshimenga atshi ke tshivua ne bua kuikala muaba uvua Mukokeshi uvuabu balaye mua kuledibua.​—Mika 5:2.

Ebu si mbutuku bua mushinga mukole’s! Mu mpata, bukenke bukole buvua bukenkesha muaba uvua balami ba mikoko. Tshivua butumbi bua Yehowa! Muanjelu wa Nzambi wakambila balami ba mikoko ne: “Kanutshinyi to, bualu tangilayi! Ndi nnumanyisha lumu luimpe lua disanka dinene diapeta bantu bonso. Bualu lelu, mbanulelele mupandishi mu tshimenga tshia Davidi, yeye udi Kristo, Mukalenge. Etshi ntshimanyinu kunudi: Nenusangane muana wa ku dibela mujingila mu mpolu ya bilamba, mulale mu tshidilu tshia nyama.” Diakamue, banjelu ba bungi bakamunemeka, bamba ne: “Butumbi buikale kudi Nzambi muulu mutumbuke ne ditalala dikale pa buloba munkatshi mua bantu badiye muanyishe.”​—Luka 2:10-14.

Pavua banjelu baye, balami ba mikoko bakambilangana ne: “Tuyayi anu mpindieu ku Beteleheme bua kumona bualu budi buenzeke, budi Yehowa mutumanyishe ebu.” (Luka 2:15) Bakaya lukasa ne kusangana Yezu muana mutoke anu muaba uvua muanjelu muambe ne: ke wamusanganabu au. Padi balami ba mikoko balonda tshivua muanjelu mubambile, muntu yonso uvua mumvue bualu ebu uvua ukema. Mariya uvua mulame malu onso aa ne wakelangana meji mu muoyo wende a tshivua mêyi au umvuija.

Lelu bantu ba bungi batu bitabuja ne: Yezu uvua muledibue mu dia 25 ngondo wa dikumi ne muibidi. Kadi mu Beteleheme, ngondo wa dikumi ne muibidi ngua mvula ne mashika. Imue misangu, too ne neje itu iloka. Tshikondo tshia nanku mu tshidimu bivua mua kuikala bikole bua balami ba mikoko kuikala batshishila mu mpata ne bimuna biabu. Kabidi mukokeshi wa Lomo kavua mua kulomba bantu bakavua ne lungenyi lua kumutombokela bua kuenza luendu lua matuku a bungi munkatshi mua muvu wa mashika makole bua kudifundisha ku mikanda to. Bidi bimueneka bimpe ne: Yezu uvua muledibue tshikondo kampanda mu ngondo wa dikumi.