Mwangana waWangana WavaLoma, Kesale Angusutu, ahanyine lushimbi ngwenyi vatu vosena vayenga nakulisonekesa. Ngachize, Yosefwe naMaliya navakiko vakashile ungeji wakuya kunganda yaMbetelema kuze asemukilile Yosefwe, kusulo yaYelusalema.

MuMbetelema mwazalile navatu vaze vejile nakulisonekesa. Ngocho chihela chasalileko chakutwama Yosefwe naMaliya shina mumulaka, muze valaminyinenga vimbulu navimuna veka. Omu mukiko asemukilile Yesu. Maliya avungilile mwanenyi hamahina nakumusavalika muulilo wavimuna.

Kalunga ikiye alingishile numba Kesale Angusutu ahane vatu lushimbi elu lwakulisonekesa. Mwomwo ika? Mwomwo echi chalingishile Yesu asemukile muMbetelema, nganda yakakuluka yenyi Mwangana Ndavichi. Visoneka vyavulukile chimweza ngwavyo, eyi yikiko nganda mwakasemukila Muka-kuyula uze vashikile.—Mika 5:2.

Ufuku kanou wapwile waulemu chikupu. Tufunga vaze vapwile muchipapa vamwene kumunyika chachinene. Kumunyika kana chapwile chaupahu waYehova. Kangelo kaKalunga alwezele ava tufunga ngwenyi: “Kanda namwivwa womako, mwomwo nangumyambulila mujimbu wamwaza uze naukaneha kuwahilila chachinene kuvatu vosena. Lelo lino munganda yaNdavichi munasemuka mulwilo wenu, ikiye Kulishitu, Mwata. Echi chikiko chinjikizo namukejivilaho: Namukawana kemba wakuvungila hamahina, vanamusavalika muulilo wavimuna.” Kukasumuka vangelo veka vaneza, vambile ngwavo: “Vamutohwesenga Kalunga uze atwama mwilu, kaha hamavu hapwenga kuunda kuli vatu vaze eji kwivwilanga kuwaha.”—Luka 2:10-14.

Omu vangelo valingile nyimako, vaze tufunga vambile ngwavo: “Tuyenu kuMbetelema tukamone chuma chinasolokako chize natujimbwila Yehova.” (Luka 2:15) Vanguhwishile nakuya, kaha vawanyine Yesu kuze vene avalwezele kangelo. Ava tufunga vambulwile mazu avalweze kangelo, kaha vatu vosena valikomokelele chikuma. Maliya alamine mazu osena awa, kaha awashinganyekelenga mumuchima wenyi.

Vatu vavavulu makumbi ano vafwelela ngwavo Yesu asemukile haDecember 25. Oloze kakweji waDecember apwa hikakweji wavula nachishika muMbetelema. Ngachize, tufunga kaveshi kuhasa kupwa muchipapa nakulama mikoko javo halwola kaneluko. Kaha nawa, Kesale mwangana wavaLoma keshi kuhasa kulweza vatu vaze atachikijile ngwenyi vakulikanga, vatambuke ungeji wamakumbi amavulu mungonde kaneyi yavula mangana vayenga nakulisonekesako. Ngocho chasoloka nge Yesu asemukile muOctober.