Sezari Augustu, mutongi wo Roma, wakadira mutemo wokuti vandhu vese vanodikana kuitihwa ndhariro. Ngokudaro, Jasefa na Maria vaidikana kufamba kwenda kwavakabarihwa, Bheterehema ngo kakusi ko Jerusarema.

Vandhu vainga vakazara ku Bheterehema kuti vataririhwe. Ndau yavakakwanisa kuwana basi, yainga yo mucibaya co mbongoyo no nyama jimweni. Ndimona makabarihwa Jesu. Maria womufukija ngo nguvo perepo womurajika mu mujiyo waidihwa zvokuha zvo zvinyama.

Tingati Sezari wainga akatumwa ndi Mwari kamare kuti adire mutemo uwu wo kutaririsa vandhu. Ngenyi? Ngo kuti izvi zvakaitisa kuti Jesu abarihwe ku Bheterehema ku dhorobha ro majicekuru ake, mambo Dhavhidhi. Bhaibheri rainga rakananga kare kuti Mutongi wainga akagondeswa waizobarihwa mu dhorobha rondhori.—MIKEYA 5:1.

Ici ciitiko cinosisira maningi! Cousiku, kwakabwaka cieja cakabveneka pese paigara vahavisi kumahavo. Rainga goja ra Jehovha! Ngirozi ya Jehovha yakavabvunja kuti: “Mucathya! Ndaza komuzivisa masoko akanaka anodakajisa vandhu vese: Nyamasi, mu guta ra Davidi mabarihwa Muponesi, ndi Kristu Tenji. Ngaici civoniso cokuti mumuzive: Munozowana cimwana cakafukijwa ngo nguvo no cakadihwa mu citengu.” Ciriporipoco, dungwa ro ngirozi jimweni jakaviyavo jeciti: “Ngaakujwe Mwari mugore, ngavagarisike, pasi pano vandhu vakadikwa ndiyena”—Luka 2:10-14.

Ngirozi pajinopinda, vahavisi vosara vecibvunjana kuti: “Ngatende Betrehema, tovona bzakaitika no bzotaziviswa ndi Tenji.” (Luka 2:15) Ivona vopinda ngo kukasika vecienda koopsaka mwana mutete, voenda komukhanda maingaya makanangwa ngo ngirozi kuti Jesu ngo maaizonga ari kamare. Vahavisi pavanovaverengera zvainga zvakanangwa ngo ngirozi, vese vanoshamaisika ndizvona. Maria wakaviga masoko aya mumwoyo make womarangarijisisa.

Vazinji nyamasi vanotendera kuti Jesu wakabahwa mu dhiya 25 yo mweji wa Mbuji. Asi ku Bheterehema, mweji wa Mbuji i mweji waina maningi nvura no kutondhora maningi. Mu mweji uwu vahavisi avacaiejehwepi ndhambo vecihavisa mushambi javo. Zve azvingaiti kuti mutongi wo vaRoma akumbire vandhu vainga vakanyangajwa ndiyena kuti vafambe mumango wakareba maningi pakati po cipepo kuti vaende kootaririsa. Izvi zvinovonesa kuti Jesu wakabahwa mu mweji wa Gumi Guru.