King Augustus bilong Rome hem mekem wanfala law for evriwan mas go and givim nem bilong olketa long gavman. So Joseph and Mary mas go long Bethlehem, taon wea Joseph born long hem wea stap long south.

From staka pipol kam long Bethlehem for gavman raetem nem bilong olketa, no eni ples for Joseph and Mary stap. So tufala stap long ples for keepim olketa donkey and olketa nara animal and Mary bornem Jesus long there. Hem pasolem Jesus long kaleko and mekem hem leidaon insaed long samting for putim kaikai bilong olketa animal.

Bible talem finis Ruler wea God promis for sendem kam bae hem born long Bethlehem. So masbi God nao bihaenem datfala law bilong King Augustus mekem Jesus savve born long Bethlehem long taon bilong laen dadi bilong hem, King David.—Micah 5:2.

Long datfala important naet, laet from Jehovah hem shaen kam long olketa man wea stap aotsaed for lukaftarem sheepsheep! Wanfala angel sei long olketa: “Iufala no fraet! Mi kam for talem gud nius wea bae mekem evriwan hapi tumas, bikos wanfala man wea bae sevem iufala hem born tuday long datfala taon wea David tu hem born long hem. Disfala man hem Christ, wea hem nao Lord. Sapos iufala lukim wanfala baby wea olketa pasolem long kaleko and hem leidaon insaed samting for putim kaikai bilong animal, bae iufala savve, hem nao datfala baby.” Semtaem nomoa, staka nara angel kam and sei: “Praisem God wea stap long heven, and pipol long earth wea mekem God hapi bae garem peace.”—Luke 2:10-14.

Taem olketa angel lusim olketa man hia, olketa sei: “Iumi mas go long Bethlehem distaem mekem iumi lukim samting wea happen wea Jehovah storyim long iumi.” (Luke 2:15) Olketa hariap go and lukim datfala baby olsem angel hem talem. Taem olketa man wea lukaftarem sheepsheep storyim samting wea angel talem long olketa, evriwan wea herem datwan barava sapraes tumas. Mary hem no forgetim olketa toktok hia, and hem ting raonem wanem nao olketa samting hia minim.

Staka pipol distaem tingse Jesus hem born long December 25. Bat long December, hem rain and hem cold tumas long Bethlehem. And long samfala taem hem snow tu. Long datfala taem long year hard tumas for olketa man stap aotsaed long naet witim sheepsheep bilong olketa. And tu, hard for king bilong Rome askem pipol wea againstim hem finis for wakabaot farawe long taem wea hem barava cold. Jesus hem born long taem wea hem no cold tumas, luk olsem long October.