César Augustoqa Roma suyupi gobierno kasharqa. Paytaj kamacherqa, tukuy runas nacekusqanku llajtaman rispa qhelqachikamunankuta. Chayrayku Josewan Mariawanqa, Belén llajtankuman qhelqachikoj rerqanku. Chay llajtaqa Jerusalenmanta uraynejpi kasharqa.

Ashkha runas qhelqachikoj risqankurayku, Belenqa juntʼa kasharqa. Josewan Mariawantaj mana alojamientota tarerqankuchu. Ajinapi uywa kanchapi qhepakorqanku. Mariaqa chaypi Jesusta nacechikorqa. Chantá janantaswan kʼiruykuspa, uywa qaranaman puñuykucherqa.

Diospunichá César Augustoj sonqonman yuyayta churarqa, runasta llajtankuman kachananpaj. Imaraykuchus Jesusqa, ajinapi ñaupa tatan Davidpa llajtan Belenpi nacekorqa. Diosmanta Qhelqasqapeqa, unayña nisqa karqa Israelta kamachejqa Belenpi nacekunanta (Miqueas 5:2).

Jesús nacekorqa chay chʼiseqa, tʼukuna imas karqa. Belén llajtaj qaylla lomasninpi, michejkuna ovejasninkuta qhawasharqanku. Jinallapi Jehová Diospa kʼanchaynin mayta lliphipirerqa. Ujnin angelnintaj, michejkunaman nerqa: “Ama manchachikuychejchu, sumaj willaykunata willasqaykichej, chaytaj llajtantinta mayta kusichenqa. Kunan Davidpa llajtanpi nacekun pichus qankunata salvasonqachej, chay. Payqa Cristo, Señortaj. Qankunapajqa kay señal kanqa: Uj wawata tarinkichej janantaswan maytʼusqata uywa qaranapi puñukushajta”, nispa. Jinallapi chay angelwan khuska may chhika ángeles rikhurimorqanku, nerqankutaj: “Diosqa cielopi jatunchasqa kachun, kay jallpʼapitaj sonqo tiyaykuy kachun, Diospa ñaupaqenpi allinpaj qhawasqa runaspaj”, nispa (Lucas 2:10-14).

Ángeles cieloman ripusqankutawan, michejkunaqa ninakorqanku: “Jaku rinachej Belenman, qhawamuna Jehová Dios willachiwasqanchejman jina imachus kasqanta”, nispa (Lucas 2:15). Chantá michejkunaqa usqhayllata Belenman rerqanku. Diospa angelnin nisqanman jinataj, wawitata tariparqanku. Chaymantaqa angelpa nisqanta tukuy chaypi kajkunaman willarqanku, paykunataj mayta tʼukorqanku. Mariaqa michejkunaj nisqankuta umanpi japʼikorqa, imatachus niyta munasqanpitaj tʼukurerqa.

Kay tiempopi, ashkha runas yuyanku Jesusqa 25 de diciembreta nacekusqanta. Jinapis Belén llajtapeqa, diciembre killapi paran, ancha chiritaj, wakin kutistaj ritʼin ima. Michejkunaqa mana chay jina chiripi ovejitasninkuta lomapi tuta qhawankumanchu karqa. Chantapis César Augustoqa, yacharqa judíos contranpi oqharikuyta munasqankuta. Chayrayku mana chay runasta kamachinmanchu karqa, chiri tiempopi qhelqachikoj rinankuta. Chaynejta ninchej, Jesusqa mana chiri tiempopichu nacekusqanta. Astawanpis payqa ichapis octubre killapi nacekorqa.